ހަނދު ސާބިތުވެ، މާދަމާއަކީ ރަމަޟާން މަހުގެ ފުރުތަމަ ދުވަސް ކަމުގައި މިނިސްޓްރީ އޮފް އިސްލާމިކް އެފެއާޒްއިން ދާދި ދެންމެ ހާމަކޮށްފިއެވެ.
އިސްލާމިކް މިނިސްޓްރީން އެކްސްގައި ޙިއްޞާކުރި ޕޯސްޓެއްގައި ބުނީ، ހިޖުރީ ސަނަތުން 1447 ވަނަ އަހަރުގެ ޝަޢުބާން މަހުގެ 29 ވަނަ ދުވަހުގެ އިރުއޮއްސުމުގެ ފަހުން ދިވެހިރާއްޖެއަށާއި އިސްލާމީ ބައެއް ޤައުމުތަކަށް މި އަހަރުގެ ރަމަޟާން މަހުގެ ހަނދު ފެންމަތީގައި ހުންނާނެ ކަމަށް އިތުބާރު ހުރި ފަލަކީ ހިސާބުތަކުން ކަށަވަރުވާތީ އަދި ބައެއް އިސްލާމީ ޤައުމުތަކަށް މި އަހަރުގެ ރަމަޟާން މަހުގެ ހަނދު ފެނުނުކަން، އިތުބާރު ހުރި މަސްދަރުތަކުން ސާބިތުވެފައިވާތީ، ރަމަޟާން މަހާއި ޝައްވާލު މަހުގެ ހަނދު ސާބިތުކުރުމަށް ރާއްޖޭގައި ޢަމަލުކުރުމަށް ހަމަޖެހިފައިވާ އުޞޫލުގައިވާ ގޮތުގެ މަތިން މާދަމާއަކީ ރަމަޟާން މަހުގެ ފުރުތަމަ ދުވަސް ކަމަށް ކަނޑައަޅާފައިވާ ކަމަށެވެ.
https://twitter.com/MVIaffairs/status/2023778930076119116
ރާއްޖޭގައި ރަމަޟާން މަހުގެ ފުރުތަމަ ދުވަހުގެ ގޮތުގައި ގިނަ ފަހަރަށް ބަލަނީ އިސްލާމީ ބޮޑު ޤައުމަކުން އެ ދުވަހަކީ ރަމަޟާން މަހުގެ ފުރުތަމަ ދުވަސް ކަމުގައި ކަނޑައަޅައި އިޢުލާންކުރުމުންނެވެ. މިއީ ޢާންމުކޮށް މިކަން ހިނގާ ގޮތް ކަމަށްވާއިރު، ރާއްޖޭގެ މަޝްޙޫރު ފަލަކީ ޢިލްމުވެރިޔާ އަދި ކުރީގެ ރައީސް އަލްއުސްތާޛް މަޢުމޫން ޢަބްދުލްޤައްޔޫމް މިއަދު ވިދާޅުވީ، މާދަމާއަކީ ރަމަޟާން މަހުގެ ފުރުތަމަ ދުވަސްކަމުގައި ފަލަކީ ހިސާބުތަކުން ދައްކާ ކަމަށެވެ.
ރައީސް މަޢުމޫން މި މޭރުމުން ވިދާޅުވީ އެކްސްގައި ޙިއްޞާކުރެއްވި ޕޯސްޓެއްގައެވެ. މަޢުމޫން ކުރެއްވި ޕޯސްޓުގައި ވިދާޅުވީ، 1447 ވަނަ އަހަރުގެ ރަމަޟާން މަހުގެ ފުރުތަމަ ދުވަހަކީ މާދަމާ ކަމުން ދުނިޔޭގެ އެކި ކަންކޮޅުތަކުގައި ދިރިއުޅޭ ހުރިހާ މުސްލިމުންނަށް ރަމަޟާން މަހުގެ ތަޙުނިޔާ ފޮނުއްވާ ކަމަށެވެ.
https://twitter.com/maumoonagayoom/status/2023668998911484334
ރައީސް މަޢުމޫނަކީ މި ވަޤުތު ފަލަކީ ޢިލްމުގައި ރާއްޖޭގައި ހުރި އެންމެ ފުންނާބު އުސް ޢިލްމުވެރިޔާކަމުން ކޮންމެ އަހަރެއްގެވެސް ރަމަޟާން މަހުގެ ހަނދު ސާބިތުކުރުމަށް މަޢުމޫނުގެ ބަހަކަށް ދިވެހިން އިންތިޒާރުކުރެއެވެ.
މި އަހަރުގެ ކަލަންޑަރުން ދައްކަނީ ރަމަޟާން މަހުގެ ފުރަތަމަ ދުވަހަކީ މާދަމާ ކަމަށެވެ. އެހެންކަމުން ރަމަޟާން މަހުގެ އެންމެ ފަހު ދުވަހަކީ އަންނަ މާރިޗު މަހުގެ 19 ވަނަ ދުވަހެވެ.
