ޓިކްޓޮކްގައި ދިވެއްސަކު ދީނުންބޭރުވެ، އިސްލާމް ދީނަށް ފުރައްސާރަކޮށްހެދި މައްސަލަ ބަލަން އިސްލާމިކް މިނިސްޓްރީން ކަމާ ގުޅޭ އިދާރާތަކަށް ހުށަހަޅައިފި އެވެ.
އިސްލާމިކް މިނިސްޓްރީގެ މީޑިއާ ގްރޫޕުގައި މިނިސްޓަރު ޑރ. މުހައްމަދު ޝަހީމް އަލީ ސައީދު ހިއްސާކުރެއްވި މެސެޖެއްގައި ވިދާޅުވީ ވަހީ އަންނަ ކަމަށާއި އިސްލާމީ އަޤީދާ އަދި ކީރިތި މާތް ނަބިއްޔާއަށް ތައުހީނުވާ ގޮތަށް ވާހަކަދައްކާފައިވާ މީހާގެ މައްސަލަ ބަލައި ޤާނޫނީ ފިޔަވަޅު އަޅަން ކަމާބެހޭ އިދާރާތަކަށް މިދިޔަ އަންގާރަ ދުވަހު ރަސްމީކޮށް ހުށަހަޅާފައިވާ ކަމަށެވެ.
”ތިމަންނާ އަށް ވަހީ އަންނަ ކަމަށް ބުނެއާއި އިސްލާމީ ޢަޤީދާއަށާއި ކީރިތި މާތް ނަބިއްޔާއަށް ތައުހީނުވާ ގޮތައް ވާހަކަދައްކާފައިވާ މީހާގެ ދައުރުވަމުންދާ ވީޑިއޯގެ މައްސަލަ ބަލައި ޤާނޫނީ ފިޔަވަޅު އެޅުމަށް ކަމާ ބެހޭ އިދާރާތަކުގައި 15 ފެބްރުއަރީގައި މިނިސްޓްރީން ރަސްމީކޮށް އެދިފައިވާނެ ވާހަކަ ދަންނަވަން“ : އިސްލާމިކް މިނިސްޓަރ
ޓިކްޓޮކްގައި ދިވެހި ފިރިހެނަކު އިސްލާމްދީނަށް ފުރައްސާރަކޮށް އޭނާއަކީ ޔޫސުފްގެފާނުކަމަށް ދަޢުވާކޮށް، އޭނާއަށް މާތްﷲ ވަހީ ބާވާލައްވާފައިވާ ކަމަށާއި ވަހީ ބާއްވާލައްވަނީ ކީރިތި ރަސޫލާ ﷺ އަށް އެކަނި ނޫން ކަމަށް ބުނެ، އޭނާ ވަނީ ދީނަށް ފުރައްސާރަކޮށްފަ އެވެ. މިނޫނަސް ނަބިއްޔާ ﷺ އަށް ނިސްބަތްކޮށް ހަޑިހުތުރު އެތައް ވާހަކަތަކެއް ދައްކާ އޭނާ ވަނީ ފުރައްސާރަކޮށްފައެވެ.
މި މައްސަލަ ސަމާލުކަމަށް އައިސްގެން ”އެކިއެމްވީ“ އިން ދިވެހި ފުލުހުންގެ މީޑިއާ ގްރޫޕުގައި ސުވާލުކުރުމުން ބުނީ ދީނަށް ފުރައްސާރަކޮށް، ސޯޝަލް މީޑިއާގައި ޕޯސްކޮށްފައިވާ ވީޑިއޯތަކެއް ފުލުހުންގެ ސަމަލުކަމަށް ވަަނީ އައިސްފައި ކަމަށާއި މި މައްސަލައާ ގުޅޭގޮތުން ބަލަންޖެހޭ ކަންކަން ފުލުހުން ދަނީ ބަލަމުން ކަމަށެވެ.
