ހުޅަނގު އައްސޭރީގެ އިސްތިއުމާރުކޮށްފައިވާ ބިންތަކަކީ އިސްރާއީލުގެ މިލްކިއްޔާތެއް ކަމުގައި ކަނޑައެޅުމަށް އެ ޤައުމުގެ އިސްތިއުމާރީ ބާރުތަކުން ނިންމި ނިންމުން ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފި އެވެ.
ދިވެހި ސަރުކާރުން ބުނީ މި ނިންމުމަކީ ބައިނަލްއަޤްވާމީ ޤާނޫނުތަކާއި މުޅިން ޚިލާފު، އަދި ފަލަސްތީނުގެ ރައްޔިތުންގެ އިންސާނީ ޙައްޤުތަކަށް އަރައިގަތުމަށް އިސްރާއީލުން ހިންގާ ޣައިރު ޤާނޫނީ ވަޒަންވެރިވުމުގެ ސިޔާސަތުގެ ދަށުން ނިންމާފައިވާ ނިންމުމެއްކަމަށޤ ސަރުކާރުން ޤަބޫލުކުރާކަމަށެވެ.
މިފަދަ ނިންމުންތަކަކީ ބައިނަލްއަޤްވާމީ ޤާނޫނުތަކާއި ޚިލާފު ކަމެއްކަމަށާއި، މިއީ ޢަދުލުވެރިކަމާއި ދެމެހެއްޓެނިވި ސުލްހަ ޤާއިމުކުރުމުގެ ފުރުސަތުތަކަށް އެޅޭ ހުރަހެއް ކަމުގައިވެސް ދިވެހި ސަރުކާރުން ވަނީ ބުނެފަ އެވެ.
ފަލަސްޠީނުގެ ރައްޔިތުންގެ ޙައްޤުތައް ރައްކާތެރިކުރުމަށާއި، ފަލަސްޠީނުގެ މިނިވަން މުސްތަޤިއްލު ދަޢުލަތެއް ޤާއިމުކުރުމަށް ކުރާ ތާޢީދު އެގޮތުގައި ދެމި އޮންނާނެ ކަން ހާމަކުރައްވާ ދިވެހި ސަރުކާރުން ވަނީ، އިސްރާއީލުން ހިންގަމުންދާ މިފަދަ ޣައިރު ޤާނޫނީ ޢަމަލުތައް ވަގުތުން ހުއްޓުވައި، ބައިނަލްއަޤްވާމީ ޤާނޫނުތަކާއި އދ. ގެ ޤަރާރުތައް ތަންފީޒުކޮށް، އިސްރާއީލު ޖަވާބުދާރީ ކުރުވުމަށް ބައިނަލްއަޤްވާމީ މުޖުތަމަޢުއަށް ގޮވާލާފަ އެވެ.
