ވެލާނާ އިންޓަރނޭޝަނަލް އެއަރޕޯޓު (ވީއައިއޭ) ގެ އެތެރޭގެ ދަތުރުފަތުރުގެ ޚިދުމަތްތައް މާދަމާއިން ފެށިގެން، ކުރީގެ އިންޓަރނޭޝަނަލް ޓަރމިނަލަށް ބަދަލުކުރުމަށް ނިންމައިފިއެވެ.
ވީއައިއޭ ހިންގަމުން އަންނަ ކުންފުނި ކަމަށްވާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިކަމާ ގުޅިގެން ބުނެފައިވަނީ، ކުރީގެ އިންޓަރނޭޝަނަލް ޓަރމިނަލަށް އެތެރޭގެ ދަތުރުފަތުރުގެ ޚިދުމަތްތައް ބަދަލުކުރުމަށް ވާން ޖެހޭ އެންމެ ފަހުގެ ތައްޔާރީތައް ވަމުން އަންނަ ކަމަށެވެ. އޭގެ ތެރޭގައި ޓަރމިނަލަށް ގެންނަންޖެހޭ ބައެއް ބަދަލުތައް ގެނެސް މަރާމާތުގެ މަސައްކަތްތައްވެސް ހިމެނޭ ކަމަށް އެ ކުންފުނިން މަޢުލޫމާތުދެއެވެ.
ވީއައިއޭގެ އެތެރޭގެ ދަތުރުފަތުރުގެ ޚިދުމަތްތައް މާދަމާއިން ފެށިގެން ދޭނީ ކުރީގެ އިންޓަރނޭޝަނަލް ޓަރމިނަލުގެ ޓަރމިނަލް 2 އިންނެވެ. މިކަމަށްޓަކައި ޚާއްޞަ ރަސްމިއްޔާތެއް ބޭއްވުމަށް ހަމަޖެހިފައިވާއިރު ޓަރމިނަލް 2 ރަސްމީކޮށް ހުޅުއްވައިދެއްވާނީ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ.
މިދިޔަ އަހަރުގެ މިނިވަން ދުވަހާއި ދިމާކޮށް ވީއައިއޭގެ އައު އިންޓަރނޭޝަނަލް ޓަރމިނަލް ހުޅުވުމާ ގުޅިގެން، ބައިނަލްއަޤުވާމީ ހުރިހާ ދަތުރުތަކެއް މިހާރު ވަނީ އެ ޓަރމިނަލަށް ބަދަލުކޮށްފައެވެ. އެތެރޭގެ ދަތުރުފަތުރުގެ ޚިދުމަތްތައް ކުރީގެ އިންޓަނޭޝަނަލް ޓާމިނަލަށް ބަދަލުކުރަން ނިންމީ އެ ސަބަބަށްޓަކައެވެ. އެހެންކަމުން މި ބަދަލާއެކު، މީގެ ކުރިން ޑޮމެސްޓިކް ޓަރމިނަލުން ލިބެމުންދިޔަ ހުރިހާ ޚިދުމަތްތަކެއް ޓާމިނަލް 2 އިން ލިބިގެންދާނެއެވެ.
ރާއްޖޭގައި އެތެރޭގެ ދަތުރުތައް މި ވަގުތު ތިން އެއަރލައިނަކުން އަންނަނީ ކުރަމުންނެވެ. އެއީ ޤައުމީ އެއަރލައިން މޯލްޑިވިއަން، ފްލައި މީ އަދި މަންތާ އެއަރއެވެ.
