ބޮޑުތަކުރުފާނު މަގު ޒަމާނީ ފެންވަރަކަށް ތަރައްޤީކުރުމުގެ މަޝްރޫޢުގެ ދެވަނަ ފިޔަވަހީގައި ހިމެނޭ ބާޒާރުމަތީ ސަރަޙައްދުގެ މަސައްކަތް އެއްކޮށް ނިންމައި އާންމުކޮށް ހުޅުވާލައިފިއެވެ.
މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ޙަވާލުކޮށްގެން ކުރިއަށްގެންދާ މި މަޝްރޫޢުގެ ދެވަނަ ސެގްމަންޓުގައި ތާރުއެޅުމުގެ މަސައްކަތް އެއްކޮށް ނިންމާލާފައިވަނީ މިދިޔަ ހަފްތާގެ ބުދަ ދުވަހެވެ. ބޮޑުތަކުރުފާނު މަގު ހެދުމުގެ ދެވަނަ ސެގްމަންޓުގައި ހިމެނެނީ މަސްމާރުކޭޓުން ފެށިގެން ނޯތު ހާބަރު ނިމޭ ހިސާބަށްވާ ސަރަހައްދެވެ.
ފާހަގަކޮށްލެވޭ ގޮތުގައި ކޮންސްޓްރަކްޝަން މިނިސްޓްރީން މި ވަނީ އެ މަގުގައި ގަސް އިންދުމުގެ ހަރަކާތެއްވެސް ކުރިއަށް ގެންގޮސްފައެވެ. އެ ހަރަކާތުގައި ބައެއް މިނިސްޓަރުން ބައިވެރިވެވަޑައިގެންފައިވެއެވެ.
ބޮޑުތަކުރުފާނު މަގު ތަރައްޤީކުރުމުގެ މަސައްކަތް ކޮންސްޓްރަކްޝަން މިނިސްޓްރީން އެމްޓީސީސީއާއި ޙަވާލުކުރީ މިދިޔަ އަހަރުގެ އޭޕްރީލް މަހުގެ ނުވަވަނަ ދުވަހު، 455 ދުވަހުގެ ތެރޭގައި މަސައްކަތް އެއްކޮށް ނިންމާ ގޮތަށެވެ. ނަމަވެސް އެ ކުންފުނިން މަގު ހެދުމުގެ ޢަމަލީ މަސައްކަތް ފަށާފައިވަނީ މިދިޔަ އަހަރުގެ އޮގަސްޓު މަހުގެ ތެރޭގަ އެވެ. މި މަޝްރޫޢުއަށް 144 މިލިއަން ރުފިޔާ ޚަރަދުވާނެއެވެ.
ބޮޑުތަކުރުފާނު މަގު ތަރައްޤީކުރުމުގެ މަސައްކަތް އެއްކޮށް ނިމުމުން އެ މަގު ވެގެންދާނީ، އުޅަނދު ފަހަރަށާއި ހިނގާބިނގާވެ އުޅޭ ފަރާތްތަކަށް ބޭނުންކުރަން ފަސޭހަ، ޒަމާނީ ފެންވަރަށް ތަރައްޤީކުރެވިފައިވާ މަގަކަށެވެ. މި މަގު ތަރައްޤީކުރަނީ ހަތަރު ލޭނަކަށް އުޅަނދުތަކަށް ދުއްވޭނެ ގޮތަށް ކަމުން، އުޅަނދުފަހަރުތައް ތޮއްޖެހުން ބޮޑުތަނުން ކުޑަވެ، އެ ސަރަޙައްދަށް ދިމާވާ ޓްރެފިކްގެ މައްސަލަތަކަށް ދާއިމީ ޙައްލެއް ލިބިގެންދާނެއެވެ.
މި މަޝްރޫއުގެ ދަށުން ހެންވޭރު ފެރީ ޓަރމިނަލުން ފެށިގެން ނޯތު ހާބަރާ ހަމައަށް ޖުމްލަ 1،088 މީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރާނެއެވެ.
