ރަމަޟާން މަހުގެ ބިލުތަކުން ރައްޔިތުންނަށް ލުއިތަކެއް ހޯދައިދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދާ އެއްގޮތަށް، މި އަހަރުގެ ރަމަޟާން މަހުގެ ބިލުތަކަށް ޚާއްޞަ ޑިސްކައުންޓެއް ދިނުމަށްޓަކައި ވަކި ބިލެއް ތައްޔާރުކުރުމުގެ މަސައްކަތް ފަށައިފިއެވެ.
މި ނިންމުމުގެ ދަށުން، ރަމަޟާން މަހުގެ ކަރަންޓު ބިލާއި ފެން ބިލު 400 ރުފިޔާއަށްވުރެ ބޮޑު ނުވާނެހެން ޑިސްކައުންޓް ދިނުމަށް ވަނީ ހަމަޖެހިފައެވެ. މިއީ ރަމަޟާން މަހު ގޭބިސީތަކުގެ ޚަރަދުތައް އިތުރުވާ ވަގުތެއްގައި، ރައްޔިތުންގެ މާލީ ބުރަ ކުޑަކޮށްދިނުމަށް ސަރުކާރުން އެޅުއްވި މުހިންމު ފިޔަވަޅެކެވެ.
މި ޑިސްކައުންޓް ހިމެނޭހެން ބިލުތައް ތައްޔާރުކުރުމަށްޓަކައި، މީޓަރުތަކުގެ ރީޑިންގ ނެގުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވަނީ ފެބުރުވަރީ 16 އަދި 17 ވަނަ ދުވަހުއެވެ. މި ދެ ދުވަހު ކުރިއަށްދާ ރީޑިންގ ނެގުމުގެ މަސައްކަތުގެ ބޭނުމަކީ ރަމަޟާން މަހުގެ ބޭނުންކުރުމަށް އެކަނި ޚާއްޞަ ބިލެއް ތައްޔާރުކޮށް، ކަނޑައެޅިފައިވާ ޑިސްކައުންޓް ރައްޔިތުންނަށް ފޯރުކޮށްދިނުމެވެ.
ޚިދުމަތްދޭ ކުންފުނިތަކުން ބުނެފައިވަނީ، މި މަސައްކަތް ވީހާވެސް އަވަހަށް އަދި ފުރިހަމައަށް ނިންމާލުމަށްޓަކައި ހުރިހާ ކަސްޓަމަރުންގެ ފަރާތުން ވެސް ފުރިހަމަ އެއްބާރުލުން ބޭނުންވާ ކަމަށެވެ. މިގޮތުން ރީޑިންގ ނަގަން އަންނަ މުވައްޒަފުންނަށް ފަސޭހައިން މީޓަރުތަކާ ހަމައަށް ދެވޭނެ އިންތިޒާމު ހަމަޖައްސައިދިނުމަށް ވަނީ އިލްތިމާސްކޮށްފައެވެ.
ރައީސް ޑރ. މުޢިއްޒުގެ މި ނިންމެވުމަކީ ރައްޔިތުން
ގެ ޖީބަށް ލުއިކޮށްދީ، އަސާސީ ޚިދުމަތްތަކުގެ އަގު ރަމަޟާން މަހު އެއްވަރެއްގައި ހިފެހެއްޓުމަށް ސަރުކާރުން ގެންގުޅުއްވާ ހަރުދަނާ ސިޔާސަތުގެ ދަށުން ނިންމެވި ނިންމެވުމެކެވެ. މީގެ އިތުރުން، މި ފެށޭ ރަމަޟާން މަހަކީ ރައްޔިތުންނަށް ތަކްލީފެއް ނެތް އުފާވެރި މަހަކަށް ހެދުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
