ސަރުކާރު ހިންގާ ކޮންގްރެސް ޕާޓީގެ ޓިކެޓުގައި އައްޑޫ ސިޓީ ކައުންސިލަށް ކުރިމަތިލެއްވި ކެންޑިޑޭޓުންގެ ޕޯސްޓަރުތަކަށް ގެއްލުން ދީފައިވާ މައްސަލައެއް ފެންމަތިވެއްޖެ އެވެ.
ވަރަށް ހިތާމަވެރި ލަދަހުތުރު ކަމެއް މުޅި އައްޑޫ ސިޓީގެ ޕީއެންސީ ހުރިހާ ކެންޑިޑޭޓުންގެ ޕޯސްޓަރު ތަކުގައި ކަޓަރު އަޅާ އަނިޔާވެރިވުމަކީ ބަލައިގަނަވޭނެ ކަމެއްނޫން.
މިއަމަލު ހަރުކަށި އިބާރާތުން ކުއްވެރި ކުރަން !!! pic.twitter.com/Nd7MbunWrE
— Ahmed Niufal (@AhmedNiufal) February 13, 2026
މިކަމާއި ގުޅޭގޮތުން ޓީވީ ޕްރޮގްރާމެއްގައި ވާހަކަ ދައްކަވަމުން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު ސިނާން ވިދާޅުވީ ކެންޑިޑޭޓުންގެ ކެމްޕެއިން ޕޯސްޓަރު ހަރުކުރުމުގެ މަސައްކަތަކީ އައްޑޫ ޕީއެންސީ ކެމްޕެއިން ޓީމުތަކުން އިސް ނަގައިގެން ފެށި މަސައްކަތެއް ކަމަށެވެ. ނަމަވެސް ރޭ ހަރުކުރި ޕޯސްޓަރުތަކާއި ބެނާތަކަށް ބަޔަކު ގެއްލުން ދީފައިވާ ކަމަށެވެ. ގެއްލުން ދީފައިވަނީ މަރަދޫ އިން ހިތަދޫ ދަތުރުކުރާ ހައިވޭ ސަރަހައްދުގައި ހަރުކޮށްފައި ހުރި ޕޯސްޓަރުތަކަށެވެ.
”މި ސަރަަހައްދުގައި ޕޯސްޓަރު ހަރުކުރުމުގެ މަސައްކަތް ރޭ ކެމްޕެއިން ޓީމުތަކުން އަދި ސްޓިއަރިން ކޮމިޓީތަކުން ކުރީ. މަސައްކަތް އެއްކޮށް ނިންމާނުލެވުމުން ބާކީ ހުރި މަސައްކަތްތައް ކުރަން ހުކުރު ނަމާދަށް ފަހު މެންދުރު ފަހުގެ ވަގުތެއްގައި ދިޔަ އިރު ޕޯސްޓަރުތަކަށް ގެއްލުންދީފައިވާ ކަމަށް މައުލޫމާތު ލިބެނީ.“ މެމްބަރު ސިނާން ވިދާޅުވިއެވެ.
ސިނާން ވިދާޅުވީ ފޭދޫގެ އެކި ސަރަހައްދުތަކުގައި ހަރުކޮށްފައިވާ ޕީއެންސީގެ ކެންޑިޑޭޓުންގެ ޕޯސްޓަރުތަކަށް ކަޅުތެޔޮ ޖަހާފައި ވާކަމުގެ ހަބަރުތަކެއް ވެސް ލިބިފައިވާ ކަމަށެވެ.
ޕީއެންސީގެ ޕޯސްޓަރުތަކަށް ގެއްލުން ދީފައިވަނީ ކޮން ބައެއް ކަމެއް އަދި ނޭނގެ އެވެ. އަދި މި މައްސަލަ މިހާރު ވަނީ ފުލުހުންނަށް ހުށަހަޅާފައި ކަމަށް ވެސް ސިނާނު ވިދާޅުވި އެވެ.
