މި އަހަރުގެ ފިޠުރު ޒަކާތް ހަތް އެޕްލިކޭޝަނެއް މެދުވެރިކޮށް ދެއްކުމުގެ އެންމެހައި އިންތިޒާމުތަކެއް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން މިއަދު ނެރުނު އިޢުލާނެއްގައި ބުނެފައިވަނީ، 1447 ވަނަ އަހަރުގެ ފިޠުރު ޒަކާތް، ރަމަޟާން މަހުގެ ފުރުތަމަ ދުވަހުން ފެށިގެން ރަމަޟާން މަހުގެ 27 ވަނަ ދުވަހުގެ ހެނދުނު 06:00އާއި ހަމައަށް، ހަތް މުއައްސަސާއެއްގެ ޕްލެޓްފޯރމް މެދުވެރިކޮށް އޮންލައިންކޮށް ބަލައިގަތުމަށް ހަމަޖެހިފައިވާ ކަމަށެވެ.
އޭގެތެރޭގައި ހިމެނެނީ:
- ދިރާގު އެޕް / ދިރާގު ޕޭ
- އުރީދޫގެ އެމް ފައިސާ
- އިސްލާމިކް ބޭންކުގެ ފައިސާ މޮބައިލް އެކްސް
- ބީއެމްއެލް މޮބައިލް އެޕް
- ފަހިޕޭ
- އަވަސް އެޕް
- ފިނޭންސް މިނިސްޓްރީގެ ބަނޑޭރި އެޕް
މީގެ ތެރެއިން ބަނޑޭރިޕޭ އަދި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ފިޠުރު ޒަކާތް ދެއްކުމުގެ އިންތިޒާމުތައް ހަމަޖެހިފައިވާ ކަމަށް އިސްލާމިކް މިނިސްޓްރީން ވަނީ ބުނެފައެވެ. އަދި ހަމައެހެންމެ، ޢުމުރުން ދުވަސްވެފައިވާ ފަރާތްތަކާއ،ި އޮންލައިންކޮށް ޒަކާތް ދެއްކުމަށް އަޙުލުވެރި ނޫން ފަރާތްތަކަށް ޙާއްޞަކޮށް އިސްލާމީ މަރުކަޒުގެ ޖަލްސާކުރާ މާލަމުގައި ޒަކާތް ބަލައިގަތުމުގެ އިންތިޒާމުތައް އިސްލާމިކް މިނިސްޓްރީން ވަނީ ހަމަޖައްސައިފައެވެ.
މީގެ އިތުރުން ރަމަޟާން މަހުގެ ފަހުދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވާފައިވާތީ، އެ ދުވަސްތަކުގައި ކައުންޓަރުތަކުން ޒަކާތް ބަލައިގަތުމަށް ހަމަޖެހިފައިވާ ދުވަސްތަކަކީ:
- 22 ފެބުރުއަރީ – 09 މާރިޗު: ރަސްމީ ބަންދު ނޫން ކޮންމެ ދުވަހަކު 10:00އިން ފެށިގެން 13:00އާއި ހަމައަށް
- 10މާރިޗު – 19 މާރިޗު: ހުކުރު ދުވަހާއި ހޮނިހިރު ދުވަސް ފިޔަވައި ކޮންމެ ދުވަހަކު 11:00އިން ފެށިގެން 14:00އާއި ހަމައަށް
މާލެ ސިޓީ ފިޔަވައި އަތޮޅުތެރޭގެ ރަށްރަށާއި ސިޓީތަކުގައި ނަޤުދު ފައިސާއިން ފިޠުރު ޒަކާތް ބަލައިގަތުމުގެ އިންތިޒާމު ހަމަޖައްސާނީ އެ ރަށެއް ނުވަތަ ސިޓީއެއްގެ ކައުންސިލުންނެވެ.
