ރަސްމާލޭ ބިން ހިއްކުމުގެ މަޝްރޫޢުގެ ދަށުން މިހާތަނަށް ސައިޓް އޭއިން 116 ހެކްޓަރުގެ ބިން ހިއްކައި ނިމިފައިވާ ކަމަށް މި މަސައްކަތް ކުރިއަށްގެންދާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.
އެމްއޭސީއެލްއިން އެކްސްގައި ހިއްސާކޮށްފައިވާ ޕޯސްޓެއްގައި ބުނީ، ރަސްމާލޭ ސައިޓް އޭގައި ހިއްކުމަށް ހަމަޖެހިފައިވާ 137.5 ހެކްޓަރުގެ ތެރެއިން މިހާތަނަށް 116 ހެކްޓަރުގެ ބިން ހިއްކައި ނިމިފައިވާ ކަމަށާއި، މިއީ މަޝްރޫޢުގެ 84.36 އިންސައްތަ މަސައްކަތް ކަމަށް އެ ކުންފުނިން މަޢުލޫމާތުދެއެވެ. އެމްއޭސީއެލްއިން ބުނީ ރަސްމާލެ ހިއްކުމުގެ މަޝްރޫޢުގެ މަސައްކަތްތައް ހަލުވި ދުވެލީގައި، ތާވަލާ އެއްގޮތަށް ކުރިއަށްދާ ކަމަށެވެ.
https://x.com/maclmedia/status/2021876865456365638
ރަސްމާލެ ސައިޓް އޭ ގައި ބިން ހިއްކުމުގެ މަސައްކަތް ކުރިއަށް ގެންދަނީ ދުނިޔޭގެ އެންމެ ބޮޑު އެއް ޓްރެއިލާ ސަކްޝަން ހޮޕަރ ޑްރެޖަރު ކަމަށްވާ، ’ކްރިސްޓޯބަލް ކޮލޯން‘ ޑްރެޖަރު ބޭނުންކޮށްގެންނެވެ. މިއީ ޖުމްލަ 46,000 ކިއުބިކް މީޓަރުގެ ކެޕޭސިޓީގެ ޑްރެޖަރެކެވެ. މި ޑްރެޖަރު އޮޕަރޭޓް ކުރަނީ ”ޖޭން ޑެ ނަލް“ ނަމަކަށް ކިޔާ ކުންފުންޏަކުންނެވެ.
ދުނިޔޭގެ އެންމެ ފުރުތަމަ އިކޯ ސިޓީގެ ގޮތުގައި ތަރައްޤީކުރާ ރަސްމާލެ ހިއްކައި ނިމުމާއެކު މާލޭ ސަރަޙައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމަށް ސަރުކާރުން ޤަބޫލުކުރެ އެވެ. މި މަޝްރޫޢުގެ ދަށުން އަމިއްލަ ބޯހިޔާވަހިކަމެއް ނެތް އެތަކެއް ފަރާތްތަކަށް ގޯއްޗާއި ފްލެޓް ޔަޤީންވެގެންދާނެއެވެ.
ރަސްމާލެ ހިއްކުމުގެ މަޝްރޫޢުގެ އިތުރުން އެމްއޭސީއެލްއިން އަންނަނީ ގިރާވަރު ފަޅު ހިއްކުމުގެ މަސައްކަތް ވެސް ކުރަމުންނެވެ. ރަސްމާލޭ ސައިޓް އޭ ހިއްކުމުގެ މަސައްކަތް އެމްއޭސީއެލްއިން ރަސްމީކޮށް ފަށާފައިވަނީ 1 ޑިސެމްބަރު 2025 ވަނަ ދުވަހުއެވެ. ފާހަގަކޮށްލެވޭ ގޮތުގައި ކުރު މުއްދަތެއްގެ ތެރޭގައި އެ ކުންފުނިން މި ވަނީ މަސައްކަތުގެ ބޮޑު ބައެއް ނިންމާލައިފައެވެ.
