މިސްކިތްތައް ބަލަހައްޓާ މީހުންނަށް މާލޭސިޓީ ކައުންސިލުން އެކިކަހަލަ ޖެއްސުން ކުރަމުުންދާކަމަށް ތުހުމަތު ކުރައްވާ އެކަން ހުއްޓާލުމަށް ނިލަންދޫ ދާއިރާގެ މެންބަރު ފާތިމަތު ސައުދާ ގޮވާލައްވައިފިއެވެ.
ރައްޔިތުންގެ މަޖްލީހުގެ މިދައުރުގެ 3 ވަނަ ޖަލްސާގައި ވާހަކަފުޅު ދައްކަވަމުން ސައުދާ ވަނީ މިކަމުގެ ކަންބޮޑުވުން ފާޅުކުރައްވާ ވާހަކަފުޅު ދައްކަވާފައެވެ.
ސައުދާ މިމޭރުމުން ވާހަަފުޅު ދެއްކެވީ މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލަކަށް ހެދުމަށް ޓެރަރިޒަމް މަނާކުރުމުގެ ޤާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުންނެވެ. މި ބިލު މަޖްލީހަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހިމް އެވެ.
އެކަމަށް ޢިޝާރާތްކުރައްވާ ސައުދާ ވިދާޅުވީ މިސްކިތްތައް ބަލަހައްޓަން ތިބޭ މީހުންނަށް މާލެސީޓީ ކައުންސިލްގައި ހުރި އެމްޑީޕީ މީހަކު ޖެއްސުންކުރަމުން ދާކަމަށާއި، މިކަމާމެދު ބިލު ހުށަހެޅި މެންބަރު ނުވިސްނެވީ ކީއްވެތޯ ސުވާލު އުފެދޭކަމަށެވެ.
”މިސްކިތްތަކަށް ގެއްލުންދޭތީ އެކަމާ ކަންބޮޑުވެގެން އަމިއްލައަށް އިސްނަންގަވައިގެން އެމްޑީޕީ މެންބަރަކު މި އިސްލާހު ހުށައެޅުއްވީ. މިއިސްލާހާއެކު އަޅުގަނޑު ހިތައްއަރާ ކީއްވެގެންބާއޭ ނުވިސްނެވީ މިސްކިތްތައް ބަލަހަައްޓަން ލާފައި މިތިބޭ މަސައްކަތުމީހުން، މިސްކިތް ސާފުކުރަން ލާފައިތިބޭ މަސައްކަތު ދައްތައިން ނުވަތަ ބޭރުމީހުން ވިޔަސް، މަސައްކަތު މީހުންނާއި ދޭތެރޭގައި މި އެމްޑީޕީގެ އިސްމީހަކު ސިޓީކައުންސިލްގައި ހުރެގެން އެކުރަމުންދާ އުނދަގުލާ ފުރައްސާރައާއި، އެމީހުންނާދޭތެރޭ އެކުރަމުންދާ ލާއިންސާނީ ކަންތައްތަކާމެދު ކީއްވެގެންބާއޭ މި މީހުން ސަމާލުކަން ނުދެނީ“ ސައުދާ ވިދާޅުވިއެވެ.
ސައުދާ އިތުރަށް ވިދާޅުވީ މިސްކިތްތަކަށް ގެއްލުންދޭން ބަޔަކު އަޔަސް، އެތަން ބަަލަހައްޓަންތިބޭ ބަޔަކާމެދު ކައުންސިލުން އިހުމާލުވަމުންދާކަމަށެވެ. އަދި މި މައްސަލަ މެންބަރު ސައުދާއާއި، ހަމަޔަށްވެސް އަދި އެހެން މެންބަރުންނާއި ހަމަޔަށްވެސް ވަނީ އައިސްފައިކަމަށް ވިދާޅުވިއެވެ. އަދި މިހާތަނަށް މިކަން ހައްލުވެސް ކޮށްފައިނުވާއިރު، އެމްޑީޕީ މީހުން ކައުންސިލްތެރޭގައި ތިބެ، ސިޔާސީ ކަންތައްތަކާއި ގުޅުވާ މަސައްކަތު މީހުންނަށް ވަޒީފާގެ ބިރު ދައްކާ، މަސައްކަތްކުރަމުންދާ ތަން ބަދަލުކުރުމާ، ޑިއުޓީ ބަދަލުކުރުންފަދަ ކަންކަންކޮށް އެކިގޮތްގޮތުން ޖެއްސުންކުރަމުންދާ ކަމަށް މެންބަރު ސައުދާ ތުހުމަތު ކުރެއްވިއެވެ.
މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލަކަށް ހެދުމަށް ޓެރަރިޒަމް މަނާކުރުމުގެ ޤާނޫނަށް އިސްލާހު ގެނައުމުގެ ބިލު މިއަދުގެ ޖަލްސާގައި ވަނީ މެންބަރުންގެ އިއްތިފާޤުން މަޖިލީހަށް ބަލައިގެންފައެވެ. އަދި ޓެރަރިޒަމް މަނާކުރުމުގެ ޤާނޫނަށް ހުށަހެޅުއްވި އިސްލާހަށް، ބަހުސް ކުރެއްވި ހުރިހާ މެންބަރުންވެސް ވަނީ މިބިލަށް ތާޢީދުކުރައްވާފައެވެ. އަދި ވީހާވެސް އަވަހަށް ބިލުގެ މަސައްކަތް ނިންމައި، އިސްލާހު ފާސްކުރުމަށް މެންބަރުން ވަނީ އެދިވަޑައިގެންފައެވެ.
