ޅ. ކުރެންދޫގައި ބިނާކުރި އައު މިސްކިތް ’މަސްޖިދުލް ސިއްދީޤް‘ ރަސްމީކޮށް ހުޅުވައިފިއެވެ.
މިއަދު މަޢްރިބް ނަމާދަށް މި މިސްކިތް ހުޅުވައިދެއްވީ އިސްލާމިކް މިނިސްޓްރީގެ ސްޓޭޓް މިނިސްޓަރު އަލްއުސްތާޛް ޢަބްދުލްޢަޒީޒް ޖަމާލް އަބޫބަކުރެވެ. މި މިސްކިތް ހުޅުވުމަށްޓަކައި ބޭއްވި ޚާއްޞަ ރަސްމިއްޔާތުގައި ކުރެންދޫ ކައުންސިލްގެ އިސްވެރިންނާއި، ރަށުގެ ރައްޔިތުން ވަނީ ބައިވެރިވެވަޑައިގެންފައެވެ.
700 މީހުންގެ ޖާގައިގެ މި މިސްކިތަކީ ދަޢުލަތުގެ ބަޖެޓުން 14 މިލިއަނަށްވުރެ ގިނަ ރުފިޔާ ޚަރަދުކޮށްގެން ބިނާކޮށްފައިވާ މިސްކިތެކެވެ. މި މިސްކިތުގައި އޭސީ ހަރުކޮށްފައިވާއިރު، ސޯލާއިން މިސްކިތަށް ކަރަންޓު ދެވޭނެ ނިޒާމު ވެސް ވަނީ ޤާއިމުކޮށްފައެވެ. މީގެ އިތުރުން ދެ ޖިންސުގެ ފަރާތްތަކަށް ވަކިން ނަމާދު ކުރެވޭނެ އަދި ވުޟޫކުރެވޭނެ އިންތިޒާމް ވެސް ޤާއިމް ކުރެވިފައިވެއެވެ.
އަންނަ ރަމަޟާން މަސް ފެށުމުގެ ކުރިން އިތުރު މިސްކިތްތަކެއް ހުޅުވުމަށް އިސްލާމިކް މިނިސްޓްރީން ތައްޔާރުވަމުން އަންނައިރު، މި ދައުރުގެ ތެރޭގައި އިސްލާމީ ދާއިރާއިން 90 މަޝްރޫޢު ކުރިއަށްދާކަން ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ބަޔާނުގައި ވެސް ވަނީ ފާހަގަކުރައްވައިފައެވެ.
