އިސްލާމީ ޢިލްމުގައި ފާހަގަކޮށްލެވޭ ފޮތްތައް ދިވެހި ބަހަށް ތަރުޖަމާކުރުމަށް އިސްލާމިކް މިނިސްޓްރީން ފަށާފައިވާ މަސައްކަތުގެ ދަށުން، އިމާމު އިބްނުލްޤައްޔިމް ލިޔުއްވާފައިވާ، ”އައްޠުރުޤުލް ޙުކްމިއްޔާ ފިއްސިއްޔާސަތިއްޝަރްޢިއްޔާ“ގެ ދިވެހި ތަރުޖަމާ މިއަދު ނެރެފިއެވެ.
މިކަމަށްޓަކައި މިއަދު އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުނު ޚާއްޞަ ރަސްމިއްޔާތެއްގައި މި ފޮތް ނެރެދެއްވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދެވެ. ’ޝަރުޢީ ސިޔާސަތުގެ އަލީގައި ޙުކުމްކުރުމުގެ ގޮތްތައް’ގެ ނަމުގައި ނެރުނު މި ފޮތަކީ އިސްލާމީ ފިޤުޙާއި ޝަރުޢީ ސިޔާސަތާއި ފަނޑިޔާރުކަމުގެ ޢިލްމުގެ މުހިންމު މަޞްދަރުތަކުގެ ތެރޭގައި ހިމެނޭ ފާހަގަކޮށްލެވޭ ވަރަށް ޢިލްމީ ފޮތެކެވެ.
މި ފޮތުގައި އިސްލާމީ ޤަޟާއީ ނިޒާމާ ބެހޭ ފިޤުހާއި ޝަރުޢީ މަޤުޞަދުތައް ޖަމާކޮށްފައިވާއިރު، ވަޤުތާއި ޙާލަތަށް ޝަރުޢުގެ ޙުކުމްތަކާއި މަޤާޞިދުތައް ފައްތާނެ ގޮތްތަކާއި ޢަދުލުވެރިކަމާއި ޙައްޤު ޤާއިމުކުރާނެ ޤަވާޢިދުތަކާއި ހަމަތަކާއި ހެއްކާއި ޤަރީނާއާ ގުޅޭ ގޮތުން ޝަރުޢުގައި ބަޔާންވެގެންވާ އަސާސްތަކާއި މަބާދިއުތައް މި ފޮތުގައި ގެނެސްފައިވެއެވެ.
ޚަޞްމުންގެ މެދުގައި ޢަދުލަށް ޙުކުމްކުރާނެ ގޮތްތަކާއި، ޙައްޤުތައް ޙިމާޔަތްކުރާނެގޮތުގެ ޙުކުމްތައް ބަޔާންކޮށް ޝަރުޢީ ސިޔާސަތަކީ ޝަރުޢުގެ މަޤާޞިދުތައް ތަންފީޒުކުރުންކަން ކަށަވަރު ކޮށްފައިވެއެވެ. ޙުކުމްކުރުމުގެ މަޤުޞަދަކީ ޢަދުލުވެރިކަން ޤާއިމުކުރުންކަމަށާއި، އަނިޔާވެރިކަމަށް މަގުފަހިވާ އެންމެހައި ކަންކަން ނައްތާލުންކަން މި ފޮތުގައި ބަޔާންކޮށްފައިވާއިރު ޝަރުޢީ ހަމަތަކުގެ މަތިން ޙުކުމްކުރުމުގެ ގޮތްތައް ކީރިތި ޤުރުއާނާއި ސުންނަތުގެ މަންހަޖުގެ އަލީގައި މި ފޮތުގައި ބަޔާންކޮށްފައިވެއެވެ.
މިއީ އިސްލާމީ ޤަޟާއީ ޢިލްމު (އިސްލާމިކް ޖުޑިޝަލް ސައިންސް)ގެ ދާއިރާއިން ދިވެހިރާއްޖޭގައި ދިވެހި ބަހުން ޝާއިޢުކުރެވޭ އެންމެ ބޮޑު ފޮތެވެ. އެގޮތުން މި ފޮތުގައި 845 ސަފުހާ ހިމެނެއެވެ. އިސްލާމިކް މިނިސްޓްރީގެ ފަރާތުން މި ފޮތް ތަރުޖަމާކުރެއްވީ އައްޝެއިޚް ޢަލީ ނަޖީބެވެ. އަދި މި ފޮތް މުރާޖަޢާކުރެއްވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދުއެވެ.
”އައްޠުރުޤުލް ޙުކްމިއްޔާ ފިއްސިއްޔާސަތިއްޝަރްޢިއްޔާ“ އިސްލާމިކް މިނިސްޓްރީގެ ކައުންޓަރުން މިހާރު ވިއްކުމަށް ހަމަޖެހިފައިވާއިރު، މި ފޮތުގެ އަގުގެ ގޮތުގައި ކަނޑައަޅާފައިވަނީ 1،000 ރުފިޔާއެވެ.
