މާލޭގެ އުތުރު ފަރާތު ބާޒާރުމަތީ ސަރަޙައްދުން ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދަށުން އެ މަގުގައި ތާރުއެޅުމުގެ މަސައްކަތް އެއްކޮށް ނިންމާލައިފިއެވެ.
މި މަސައްކަތް ކުރިއަށްގެންދާ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މަޢުލޫމާތު ދީފައިވާ ގޮތުގައި، ބޮޑުތަކުރުފާނު މަގު ތަރައްޤީކުރުމުގެ ދެވަނަ ފިޔަވަހީގެ ދަށުން ތާރުއެޅުމުގެ މަސައްކަތް މިއަދު އެއްކޮށް ނިންމާލެވިފައިވާ ކަމަށް ވަނީ ބުނެފައެވެ. އެ މަގުގައި ތާރު އެޅުމުގެ މަސައްކަތް ފަށާފައިވަނީ ރޭގެ ވަގުތެއްގައެވެ.
We have completed the asphalt laying works for Phase 2 of the Malé North Side Boduthakurufaanu Road Development Project.
This transformative project will enhance accessibility in Malé City through the development of modern, pedestrian-friendly roads. The widened roads will help… pic.twitter.com/cgwB2PnbSg
— MTCC Plc (@MTCCPlc) February 11, 2026
ބޮޑުތަކުރުފާނު މަގުގައި ތާރުއަޅައި، އެ މަގުގެ ދުވާރު ހެދުމާއި، ކާނުތަކުގެ މަސައްކަތްތައް އެއްކޮށް ނިމިފައިވާއިރު، މިހާރު ނުނިމި ހުރީ މަގުގައި ކުރަހަންޖެހޭ ލައިންތަކުގެ މަސައްކަތްތަކާއި މަގުގައި ހަރުކުރަންޖެހޭ ސައިން ބޯޑުތަކުގެ މަސައްކަތްތައް އެކަންޏެވެ. އެމްޓީސީސީން މަޢުލޫމާތު ދޭ ގޮތުގައި މުޅި މަޝްރޫޢުގެ މަސައްކަތްތައް ކުރިއަށް އޮތް ރަމަޞާން މަހުގެ ކުރިން އެއްކޮށް ނިންމާލެވޭނެއެވެ.
ބޮޑުތަކުރުފާނު މަގު ހެދުމުގެ މަޝްރޫޢުގެ ދެވަނަ ފިޔަވަހީގެ ދަށުން ލޯކަލް މާރުކޭޓުން ފެށިގެން ނޯތު ހާބަރާ ހަމައަށް 250 މީޓަރުގެ ސަރަޙައްދެއްގައި ތާރުއަޅައިގެން ތަރައްޤީކޮށްފައިވާއިރު، މި މަސައްކަތް ނިންމައި މަގު އެއްކޮށް ހުޅުވާލުމުން މި މަގަކީ ދެކޮޅަށް ދުއްވޭ، ހިނގާ މީހުންނަށް އަމާން އަދި ފެންބޮޑުވުމުގެ މައްސަލައަށް ދާއިމީ ޙައްލެއް ލިބިފައިވާ ޒަމާނީ މަގަކަށް ވެގެންދާނެއެވެ. މި މަޝްރޫޢު ނިމުމުން މާލޭ އުތުރު ފަރާތު ބަނދަރު ސަރަޙައްދުގެ ތޮއްޖެހުން ކުޑަވެ، މުދާ އުފުލުމާއި ދަތުރުފަތުރު ކުރުމުގައި ޢާންމުންނަށާއި ވިޔަފާރިވެރިންނަށް ބޮޑެތި ފަސޭހަތަކެއް ލިބިގެންދާނެއެވެ.
މުޅި މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1,088 މީޓަރުގެ ސަރަޙައްދެއްގައި ތާރު އަޅައިގެން ޒަމާނީ ފެންވަރަކަށް ތަރައްޤީކުރުމަށް ވަނީ ހަމަޖެހިފައެވެ. މަގު ތަރައްޤީކުރުމުގެ ފުރަތަމަ ފިޔަވަހީގެ 140 މީޓަރުގެ މަސައްކަތް ނިންމައި މިހާރު ވަނީ ޢާންމުންނަށް ހުޅުވާލައިފައެވެ.
