ފަހި ދިރިއުޅުން ކޯޕަރޭޝަނުން ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ ފްލެޓުތަކުގެ ތެެރެއިން އަމާން އުދަރެސްގެ ފްލެޓެއްގައި ބިދޭސީން ލޭބަރ ކުއާޓަރ ހަދައިގެން އުޅޭތީ އެތަން 10 ދުވަސްތެރޭ ހުސްކުރަން އަންގައިފިއެވެ.
މިކަމާ ގުޅިގެން އެފްްޑީސީން ބުނެފައިވަނީ އަމާން އުދަރެސްގެ ފްލެޓެއްގައި ބިދޭސީން ލޭބަރ ކުއާޓަރ ހަދައިގެން އުޅޭކަމުގެ މައުލޫމާތު ލިބިފައިވާ ކަމަށެވެ. އެހެންކަމުން 10 ދުވަހުގެ ތެރޭގައި އެތަން ހުސްކުރުމަށް އެ ކޯޕަރޭޝަނުން ވަނީ އެދިފައެވެ. ދީފައިވާ މުއްދަތުގެ ތެރޭގައި އެކަން އެގޮތަށް ނުކޮށްފި ނަމަ ފްލެޓު އެއްބަސްވުން ބާޠިލުކޮށް ފްލެޓު އަތުލާނެކަމުގެ އިންޒާރު އެފްޑީސީން ވަނީ ދީފައެވެ.
ބިދޭސީންނަށް ލޭބަރ ކުއާޓަރ ހަދަން ފްލެޓް ދޫކޮށްފައިވާ މައްސަލައާ ގުޅިގެން އެތަނުގެ ވެރިފަރާތް 50،000 ރުފިޔާއިން މިހާރު ވަނީ ޖޫރިމަނާ ވެސް ކޮށްފައެވެ.
ގެދޮރުވެރިޔާ ސްކީމްގެ ދަށުން އެފްޑީސީން ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ މި ފްލެޓްތައް ލިބިފައިވާ މީހުންނާއި އެ ކޯޕަރޭޝަނާ ދެމެދު ވެފައިވާ އެއްބަސްވުމުގައިވާ ގޮތުން އެ ފްލެޓްތައް ކުއްޔަށް ދޫކުރުމަކީ މަނާކަމެކެވެ. ކުއްޔަށް ފްލެޓެއް ދޫކޮށްފައިވާކަން ފާހަގަކުރެވިއްޖެ ޙާލަތެއްގައި ފްލެޓް އަތުލުމުގެ ޙައްޤު އެ ކޯޕަރޭޝަނަށް ލިބިގެންވާ ކަމަށް އެއްބަސްވުމުގައި ބުނެފައިވެއެވެ.
ގެދޮރުވެރިޔާ ސްކީމްގެ ދަށުން ހުޅުމާލޭ ދެވަނަ ފިޔަވަހީގައި އެފްޑީސީން ތަރައްޤީކޮށްފައިވާ ފްލެޓްތައް ވެރިފަރާތްތަކަށް ޙަވާލުކޮށް ނުނިމެނީސް ބޮޑު އަގުގައި ކުއްޔަށް ދޫކުރުމަށް އިޝްތިހާރު ޖަހަން ފެށި މައްސަލައެއް ވެސް ފެންމަތިވިއެވެ. އެ މައްސަލައާ ގުޅިގެން އެފްޑީސީން މީގެ ކުރިން ބުނެފައިވަނީ، އެފަދަ ފްލެޓުތައް ދެނެގަނެ، ފްލެޓުގެ އެއްބަސްވުން ބާޠިލުކުރާނެ ކަމަށެވެ.
