މިސަރުކާރު ޖަވާބުދާރީ ކުރުވަނީ ރައްޔިތުންގެ ދަރުބާރުގައި ރައީސް ޑރ. މުޢިއްޒު އަމިއްލަފުޅަށް ކަމަށް ރައީސް އޮފީހުގެ މިނިސްޓަރ އަލީ އާރިފް ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވެފައިމިވަނީ ކުރިއަށްއޮތް ކައުންސިލް އިންތިޚާބުގައި ސަރުކާރު ޖަވާބުދާރީކުރަން އިދިކޮޅު ކެންޑިޑޭޓުންނަށް ވޯޓު ދިނުމަށް އިދިކޮޅު ސިޔާސީ ޕާޓީތަކުން ކެމްޕޭނު ކުރަމުންދާ ދަނޑިވަޅެއްގައެވެ.
Idhikolhun bunaakamah vanee Sarukaaru jawaabudhaaree kuruvan voteh dheyshey. Noon noon, Ehen meehaku ekan kureythoa balaakah Ra’ees @MMuizzu madeh nukuravvaa, Vazeerunnaa MDs govaigen raajjeyge hurihaa rayyithun gaathah seedhaa vadaigen, rayyithunge dharubaarugai Ra’ees @MMuizzu…
— Ali Arif (@Ali__Arif) February 10, 2026
މިކަމަށް ޢިޝާރާތް ކުރައްވާ އަލީ އާރިފް ވިދާޅުވީ ސަރުކާރު ޖަވާބުދާރީ ކުރުވާކަށް އިތުރު ބަޔަކު ނުޖެހޭކަމަށާއި، ރައީސް އަމިއްލަފުޅަށް ރައްޔިތުންގެ ގާތަށްގޮސް އެމަސައްކަތް އެބަ ކުރައްވާ ކަމަށެވެ.
”އިދިކޮޅުން ބުނާކަމަށްވަނީ ސަރުކާރު ޖަވާބުދާރީ ކުރުވަން ވޯޓެއް ދޭށޭ، ނޫން ނޫން، އެހެން މީހަކު އެކަން ކުރެވޭތޯ ބަލާކަށް ރައީސް މުޢިއްޒު މަޑެއް ނުކުރައްވާ، ވަޒީރުންނާ އެމްޑީން ގޮވައިގެން ރާއްޖޭގެ ހުރިހާ ރައްޔިތުން ގާތަށް ސީދާ ވަޑައިގެން، ރައްޔިތުންގެ ދަރުބާރުގައި ރައީސް މުޢިއްޒު އަމިއްލަފުޅަށް މި ސަރުކާރު ޖަވާބުދާރީ އެ ކުރުވަނީ“ އަލީ އާރިފް ވިދާޅުވިއެވެ.
އާރިފް ވިދާޅުވީ މިހާރުވެސް ސިލްސިލާ ގޮތެއްގައި އެކި ފަންތީގެ އެކި ގިންތީގެ ރައްޔިތުންގެތެރެއިން ގާތަށް ރައީސް އަމިއްލަފުޅަށް ވަޑައިގެން ޖަވާބުދާރީވެ ވަޑައިގަންނަވަމުން އެބަ ގެންދަވާކަމަށެވެ. މަދު މީސްކޮޅެއްގެ ބަދަލުގައި ރައީސް ވަޑައިގަންނަވަނީ ސީދާ ރައްޔިތުންގެ ދަރުބާރަށް ކަމަށްވެސް މިނިސްޓަރ ވިދާޅުވިއެވެ.
ދެ އަހަރަށްވުރެ ކުރު މުއްދަތެއްގެ ތެރޭގައި، އެއީ ޖުމްލަ 1 އަހަރާއި 11 މަސް ދުވަހުގެ ތެރޭގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ 187 ރަށަށް ޒިޔާރަތް ކުރައްވާފައެވެ. އަދި މާލެސިޓީއަށް ނިސްބަތްވާ ރައްޔިތުންނާއި، ވިޔަފާރިވެރިން، ޒުވާނުން، މަސްވެރިން، ޓެކްސީ ދުއްވާ ފަރާތްތައް، މިހެންގޮސް އެކި ދާއިރާތަކުން ގިނަ ރައްޔިތުންނާއި ބައްދަލުކުރައްވާ، ކަންބޮޑުވުންތައް އަޑު އައްސަވާ ސީދާ މައްސަލަތައް ދެނެގަތުމަށް ރައީސް މުޢިއްޒު ވަނީ މުހިންމު މަސައްކަތްޕުޅުތަކެއް ކުރައްވާފައެވެ.
މިއީ ދިވެހިރާއްޖޭގެ ތާރީޚުގައި ރެކޯޑެކެވެ. ކޮންމެ ރަށަކަށް ކުރައްވާ ކޮންމެ ދަތުރުފުޅަކާއެކު ރައީސް މުޢިއްޒު ދެއްވަމުންގެންދަވާ މުހިންމު މެސެޖަކީ، ކޮންމެ ރަށެއް ވެސް މުހިންމު ކަމާއި، ކޮންމެ ރައްޔިތަކަށް ވެސް ފުރިހަމަ އަޅާލުން ޙައްޤުކަމެވެ. އެމަނިކުފާނު އިސްކުރެއްވީ ވެވަޑައިގެންނެވި ވައުދުތައް ފުއްދަވައި، ރައްޔިތުންނާ ގާތުން ޚިދުމަތް ދެއްވުމަށެވެ. މިދެންނެވި މުއްދަތުގައި މިހާތަނަށް އިންތިޚާބުވެފައިވާ އެއްވެސް ރައީސަކު މި އަދަދަށް ރައްޔިތުންގާތަށް ދަތުރުކޮށްފައެއް ނުވެއެވެ. އަދި ރައްޔިތުންގެ އަޑު އައްސަވާފައިވެސް ނުވެއެވެ. ނަމަވެސް، ރައީސް މުޢިއްޒުގެ މި ދަތުރުފުޅުތަކުން ހާމަކޮށްދެނީ މިމަސައްކަތުގެ އަޑީގައިވާ ފުން މާނައެކެވެ. އެއީ ރައްޔިތުންނާއި ގާތުން ވެރިކަން ކުރައްވާ، ހެޔޮ ވެރިއެއްގެ ޒަޢާމަތެކެވެ. ފުރަތަމަ ރައްޔިތުންގެ އަޑުއަހާ، ދެން އެމީހުންގެ ބޭނުންތަކަށް ރިޢާޔަތްކޮށް ޢަމަލުކުރާ ވެރިކަމެކެވެ. މިއީ މޭޒުދޮށުގައި ނޫން، އެހެނަސް ރައްޔިތުންނާ ގާތުން، ރައްޔިތުންގެ ފަޅީގައި ހުންނަަވައިގެން، ސަރުކާރުގެ ސިޔާސަތުތައް ބައްޓަންކުރާ، ޙަރަކާތްތެރި ވެރިކަމެއްގެ ފުރިހަމަ މިސާލެކެވެ.
