ރާއްޖެއިން ޤަބޫލުކުރާ ޓެރަރިސްޓް ޖަމާޢަތްތަކުގެ ލިސްޓުން ސީރިއާގައި ވެރިކަންކުރާ ހަނގުރާމަވެރި ޖަމާޢަތް ޙަޔާތު ތަޚްރީރު އަލް ޝާމް (އެޗްޓީއެސް)ގެ ނަން އުނިކޮށް، ދިވެހިންނަށް އެ ޤައުމަށް ދަތުރުކުރުމުގެ ހުއްދަދީފިއެވެ.
ޓެރަރިޒަމް މަނާކުރުމުގެ ޤާނޫނުގެ ދަށުން، ކޮންމެ އަހަރަކު އެއްފަހަރު ރާއްޖެއިން ޤަބޫލުކުރާ ޓެރަރިސްޓް ޖަމާޢަތްތަކުގެ ލިސްޓާއި، ރާއްޖެއިން ދަތުރުކުރުން މަނާވާ ހަނގުރާމަވެރި ސަރަޙައްދުތަކުގެ ލިސްޓެއް އެކުލަވާލަންޖެހެއެވެ. އެގޮތުން 2019 ވަނަ އަހަރުން ފެށިގެން އެޗްޓީއެސްއަކީ ޓެރަރިސްޓް ޖަމާޢަތެއް ކަމަށް ކަނޑައަޅައި، ދިވެހިން ސީރިއާއަށް ދަތުރުކުރުން އޮންނަނީ މަނާކޮށްފައެވެ.
ސީރިއާގެ ކުރީގެ ރައީސް ބައްޝާރުލްއައްސަދުގެ ވެރިކަން ބަދަލުވި ފަހުން ނިމިދިޔަ 2025 ވަނަ އަހަރު ރާއްޖެއިން ޓެރަރިސްޓް ޖަމާޢަތްތަކުގެ ލިސްޓް އެކުލަވާލިއިރު ވެސް އެޗްޓީއެސްގެ ނަން އޮތްކަން ފާހަގަކޮށްލެވެ އެވެ. ރާއްޖެއިން މި ބަދަލު ގެނެސްފައި މިވަނީ، ދުނިޔޭގެ ގިނަ ޤައުމުތަކަކުން، އެ ޖަމާޢަތް ބަލައިގަންނަމުންދާތީއެވެ. އޭގެތެރޭގައި އެމެރިކާ ވެސް ހިމެނެއެވެ.
ޓެރަރިޒަމް މަނާކުރުމުގެ ޤާނޫނުގެ ދަށުން، ނެޝަނަލް ސެކިއުރިޓީ ކައުންސިލްގެ ލަފާގެ މަތިން އެ ލިސްޓު އެކުލަވާލައި ރައީސުލްޖުމްހޫރިއްޔާގެ އޮފީހުން ވަނީ މިދިޔަ ބުރާސްފަތި ދުވަހު ސަރުކާރުގެ ގެޒެޓްގައި ޝާއިޢުކޮށްފައެވެ. މި ލިސްޓު ޤައުމީ ސަލާމަތާ ބެހޭ މަޖިލީހުގެ އިރުޝާދުގެ ދަށުން ބަލަހައްޓާނީ އެމްއެންޑީއެފްއިންނެވެ.
ޙަޔާތު ތަޚްރީރު އަލް ޝާމަކީ ސީރިއާގައި ހަރަކާތްތެރިވާ ހަނގުރާމަވެރި ޖަމާޢަތަކެވެ. މި ޖަމާޢަތުން ސީރިއާގެ ވެރިކަމާ ޙަވާލުވެފައިވަނީ، 2024 ވަނަ އަހަރު އެ ޤައުމުގެ ކުރީގެ ރައީސް ބައްޝާރުލްއައްސަދުގެ ވެރިކަން ވައްޓައިލުމަށްފަހުގައެވެ.
