ރައީސް ޑރ. މުޢިއްޒު ވަޒީރުކަމުން، މޭޔަރުކަމުން، ރައީސްކަމަށް ވަޑައިގެންނެވިއިރުވެސް މާލެސިޓީއަށް އޮތް ލޯތްބަށް އެއްވެސް ބަދަލެއް އައިސްފައިނުވާކަމަށް ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މިފަދައިން ވިދާޅުވީ އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައެވެ. ޝުޖާއުގެ ޕޯސްޓްގައި ޢިޝާރާތްކުރެއްވީ މިއަދު ރައީސް ޑރ. މުޢިއްޒު ބޮޑުތަކުރުފާނުމަގުގެ ދެނަވަ ފިޔަވަހީގެ މަސައްކަތް ހިނގާ ނުހިނގާގޮތް ބައްލަވާލެއްވުމަށް އެ ސަރަޙައްދަށް ވަޑައިގެން އުޅުއްވި އުޅުއްވުމަށެވެ.
ބޮޑުތަކުރުފާނުމަގުގެ މަސައްކަތް ކުރިއަށްދާގޮތް ބައްލަވާލައްވަން ވަޑައިގެން ރައީސް ހުންނެވި ފޮޓޯތައް ހިއްސާކުރައްވަމުން ޝުޖާއު ވިދާޅުވީ ރައީސް މުޢިއްޒުއަކީ މާލެ އަށް އަބަދުވެސް ހެޔޮއެދޭ މީހާ ކަމަށާއި، އެއީ މާލެ ބަދަލު ކުރިމީހާ ކަމަށެވެ. އަދި ކުރިއަށް އޮތްތަނުގައިވެސް ބަދަލު ކުރައްވާނީވެސް ރައީސް މުޢިއްޒު ކަމަށާއި، އެމަނިކުފާނު ވަޒީރުކަމުން، މޭޔަރު ކަމުން އަދި ރައީސް ކަމަށް ވަޑައިގެންނެވި އިރުވެސް މާލެއަށްއޮތް ލޯތްބަށް ބަދަލެއް ނާންނަކަމަށެވެ.
މިއީ މާލެ އަށް އަބަދުވެސް ހެޔޮއެދޭ މީހާ.މިއީ މާލެ ބަދަލު ކުރިމީހާ.ކުރިއަށް އޮތްތަނުގައިވެސް ބަދަލު ކުރާނެ މީހާ.މާލެއަށް ވަޒީރުކަމުން،މޭޔަރު ކަމުން އަދި ރައީސް ކަމަށް ވަޑައިގެންނެވި އިރުވެސް އޮތް ލޯތްބަށް ބަދަލެއް ނާދޭ.
މިއީ ރައީސް ޑރ @MMuizzu #ދިވެހީންގެރާއްޖެ pic.twitter.com/Su6cxogzom— Ibrahim Shujau (@IbrahimShujaau) February 8, 2026
މި މަޝްރޫޢުގެ މަސައްކަތްތައް ހިނގަމުންދާގޮތް ބައްލަވާލެއްވުމަށް ބޮޑުތަކުރުފާނު މަގުގެ އުތުރު ފަރާތުން މަސްމާރުކޭޓު ސަރައްޙައްދުގައި މަގު ތަރައްޤީކުރުމަށް ކަނޑައަޅާފައިވާ ސައިޓަށް ވަޑައިގެން ރައީސް މުޢިއްޒު ވަނީ އެ މަޝްރޫޢުގެ ދެވަނަ ފިޔަވަހީގެ މަސައްކަތް ކުރިއަށްގޮސްފައިވާ މިންވަރު ވަޒަންކުރައްވައިފައެވެ.
ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދަށުން ދެވަނަ ސެގްމެންޓް ތަރައްޤީކުރާނީ މަސްމާރުކޭޓުން ފެށިގެން ނޯތު ހާބަރު ނިމޭ ސަރަޙައްދާއި ހަމައަށެވެ. ކުރިއަށް އޮތް ރަމަޟާން މަހުގެ ކުރިން މަގު ހެދުމުގެ މަސައްކަތް އެއްކޮށް ނިންމާލެވޭނެ ކަމަށް މި މަސައްކަތް ކުރިއަށްގެންދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ވަނީ ހާމަކޮށްފައެވެ.
ބޮޑުތަކުރުފާނު މަގު، ތަރައްޤީކުރުމުގެ މަސައްކަތް ނިމުމުން އެ މަގު ވެގެންދާނީ، ޒަމާނީ ފެންވަރަށް ތަރައްޤީކުރެވިފައިވާ، ފެން ހިންދާ ނިޒާމާއިއެކު، ހަތަރު ލޭނަކަށް މަގު ފުޅާކުރެވި، އުޅަނދު ފަހަރަށާއި، ހިނގާބިނގާވެ އުޅޭ ފަރާތްތަކަށް ބޭނުންކުރަން ފަސޭހަ މަގަކަށެވެ.
މިދިޔަ އަހަރުގެ އޭޕްރީލް މަހުގެ ނުވަވަނަ ދުވަހު ފެށި މި މަޝްރޫޢު އެމްޓީސީސީއާ ޙަވާލުކޮށްފައިވަނީ 144 މިލިޔަން ރުފިޔާއަށެވެ. މި މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1،088 މީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރުމަށް ވަނީ ހަމަޖެހިފައެވެ.
