އިސްރާއީލުން ޣައްޒާގެ އެކި ސަރަހައްދުތަކުގައި ހަމަލާތައް އިތުރުވަމުންދާހާ ހިނދަކު، ޣައްޒާގައި ”ހަނގުރާމަ ހުއްޓާލުމަށް“ މަޝްވަރާ ކުރުމަކީ އެއްވެސް މާނައެއް ނެތް ކަމެއް ކަމަށް ހަމާސްގެ ތަރުޖަމާން ހާޒަމް ގާސިމް ވިދާޅުވެއްޖެއެވެ.
ގަތުލުއާންމު ހުއްޓާލުމުގެ އެއްބަސްވުމަށް މިދިޔަ އޮކްޓޫބަރު މަހުގެ 10 ވަނަ ދުވަހުން ފެށިގެން އަމަލު ކުރަން ފެށިފަހުން ޣައްޒާގައި ކޮންމެ ދުވަހަކު ހަމަލާތައް ދެއެވެ. އެންމެ ފަހުގެ ތަފާސްހިސާބުތައް ދައްކާގޮތުން ފަހުން ދޭން ފެށި ހަމަލާތަކުގައި ފަލަސްތީނުގެ 576 މީހުން ޝަހީދުކޮށްލާފައިވާއިރު، 1،543 މީހުން ޒަހަމްކޮށްލާފައިވާ ކަމަށެވެ.
ގަތުލުއާންމު ހުއްޓާލުމުގެ އެއްބަސްވުމަށް އިސްރާއީލުން އަމަލު ކުރަމުން ނުދާ މައްސަލައިގައި ހަމާސް އިން ޓެލެގްރާމް މެދުވެރިކޮށް ނެރުނު ބަޔާނެއްގައި ގާސިމް ވިދާޅުވީ އިސްރާއީލުގެ ސަރުކާރުން މީޑިއޭޓަރުންނާއި އެމެރިކާ ސަރުކާރުގެ މަސައްކަތަށް އިޖާބަ ނުދޭ ކަމަށާއި އެއްބަސްވެފައިވާ ކަންކަން ތަންފީޒު ކުރުމަށް ގޮވާލާ ގޮވާލުންތަކަށް އިޖާބަ ދެމުން ނުދާ ކަމަށެވެ.
އަދި ޣައްޒާގެ އެޑްމިނިސްޓްރޭޝަން ކޮމެޓީން ޣައްޒާއަށް ވަދެ އެ ސަރަހައްދުގެ ރައްޔިތުންނަށް އެހީ ފޯރުކޮށްދިނުމުގެ މަސައްކަތް ފެށުމަށް އިސްރާއީލަށް ޕްރެޝަރު ކުރުމަށް ހުރިހާ ޕާޓީތަކަށް ވެސް އޭނާ ގޮވާލެއްވިއެވެ.
ފަލަސްތީނިއަން ނޭޝަނަލް އިނިޝިއޭޓިވްގެ ސެކްރެޓަރީ ޖެނެރަލް މުސްތަފާ ބަރްޣޫތީ އަލްޖަޒީރާ އަށް ދެއްވި އިންޓަވިއުއެއްގައިވެސް ތަކުރާރުކޮށް ވިދާޅުވީ އިސްރާއީލުން ބައިނަލްއަގުވާމީ ގާނޫނުތަކާ ހިލާފުވެފައިވާ ކަމަށެވެ.
”ހަގީގަތުގައި އިސްރާއީލުން ވަނީ ޣައްޒާގައި ބައިނަލްއަގުވާމީ ގާނޫނުތައް ހަލާކުކޮށްލާފައި. އަދި މުޅި ދުނިޔެ ވެސް އެ މަންޒަރު ފެނުނު“ އޭނާ ވިދާޅުވިއެވެ.
ޣައްޒާގައި 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ހިންގަމުންދާ ގަތުލުއާންމު ގައި ޝަހީދުކޮށްލި މީހުންގެ އަދަދު 72،027 އަށް އަރާފައިވާ ކަމަށް އެންމެ ފަހުގެ ތަފާސްހިސާބުތަކުން ދައްކައެވެ.
