އަލަށް އުފެދޭ ޕަބްލިކް ވޯކްސް ޔުނިޓްތަކާއެކު 500 އެއްހައި ވަޒީފާ އުފެދޭނެ ކަމަށް ސިޓީސް މިނިސްޓަރު އާދަމް ޝަރީފް ޢުމަރު ވިދާޅުވެއްޖެއެވެ.
ދަޢުލަތުގެ މީޑިއާގެ ޕްރޮގްރާމެއްގައި ދެއްވި އިންޓަވިއުއެއްގައި މިނިސްޓަރު ވިދާޅުވީ، މިއީ ރައްޔިތުންނާ ގާތުން ޚިދުމަތް ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ވިސްނުންފުޅުގެ ދަށުން ކުރެވޭ މުހިންމު މަސައްކަތެއް ކަމަށެވެ. އަދި މިކަމަށް ބޭނުންވާ އުޅަނދުތައް އަންނަ އޭޕްރީލް މަހުގެ ތެރޭގައި ލިބޭނެ ކަމަށް މިނިސްޓަރު ވިދާޅުވި އެވެ.
”މިކަންކަމަށް ބޭނުންވާ ވަސީލަތްތައް ހަމަ ކުރެއްވުމުމުގެ މަސައްކަތް ރައީސް އެ ވިދާޅުވީ ކުރައްވާ ވާހަކަ. އަޅުގަނޑުމެންނަށް ޤަބޫލުކުރެވޭނީ ރައީސް ވިދާޅުވީ މި އަހަރު މެދުތެރެއާއި ހިސާބަށް އެކަން ކުރެވޭނެ ކަމަށް. އެހެނަސް ރައީސް މަސައްކަތް ކުރައްވާ ސްޕީޑަށް ބަލާއިރު އެޕްރީލް ނުވަތަ މެއި ހިސާބަށް ދާންވާއިރަށް ތަކެތި ވެސް ލިބޭނެ ކަމަށް އަދި އެ ހިސާބަށް އަންނަންވާއިރަށް އެތަނަށް ބޭނުންވާ މުވައްޒަފުން ވެސް ނަގާނަން،“ — މިނިސްޓަރު ވިދާޅުވިއެވެ.
މި މަސައްކަތަށް 500 އެއްހައި މުވައްޒަފުން ނަގާއިރު، އޭގެތެރޭގައި ޑްރައިވަރުންނާއި، އިދާރީ މުވައްޒަފުންގެ އިތުރުން ފަންނީ މުވައްޒަފުން ހިމެނެއެވެ. މަސައްކަތަށް ގެނެވޭ އުޅަނދުތައް ދުއްވުމަށް ބޭނުންވާ ޑްރައިވަރުން ތަމްރީނުކުރުމުގެ މަސައްކަތަކީ ވެސް ސިޓީސް މިނިސްޓްރީގެ ދަށުން ކުރެވޭނެ މަސައްކަތެއް ކަމަށް އެ ޕްރޮގްރާމުގައި ދެއްވި އިންޓަވިއުގައި މިނިސްޓަރު ވިދާޅުވިއެވެ.
ރައްޔިތުންގެ މަޖިލީހުގެ 2026 ވަނަ އަހަރުގެ ފުރުތަމަ ދައުރުގެ ފުރުތަމަ ޖަލްސާގައި ރިޔާސީ ބަޔާން އިއްވަވަމުން ރައީސް ވިދާޅުވީ، ދިވެހިރާއްޖޭގެ ހުރިހާ ރަށެއްގައި ޤާއިމުކުރެވޭ ޢުމްރާނީ ވަސީލަތްތައް ހަރުދަނާ ގޮތެއްގައި ބަލަހައްޓައި މަރާމާތުކުރުމަކީ ދެމެހެއްޓެނިވި ގޮތެއްގައި ކޮންމެހެން ކުރަން ޖެހޭ މަސައްކަތެއް ކަމަށެވެ. މިކަމަށް މަގުފަހި ކުރުމަށް މިހާރު ޕަބްލިކް ވޯކްސް ޔުނިޓްތައް ޤާއިމްވެފައި ނުވާ 15 އަތޮޅެއްގެ 19 ރަށުގައި އެންމެ ޒަމާނީ ވަސީލަތްތަކާއެކު މި އަހަރުގެ މެދުތެރޭ މި ޔުނިޓްތައް ޤާއިމްކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
ޕަބްލިކް ވޯކްސް ޔުނިޓްތަކަކީ ސިޓީސް މިނިސްޓްރީގެ ދަށުން ރާއްޖޭގެ އެކި ސަރަޙައްދުތަކުގައި ހިންގަމުންދާ މުނިސިޕަލް އެކި ޚިދުމަތްތައް ދިނުމުގައި ހަރަކާތްތެރިވާ ޔުނިޓްތަކެކެވެ. މި ޔުނިޓްތައް ޢާންމުކޮށް މަސައްކަތް ކުރާނީ ކައުންސިލްތަކާއި ސަރުކާރުގެ އެކި އިދާރާތަކާއި ގުޅިގެންނެވެ.
