މިއަހަރުގެ ރިޔާސީ ބަޔާނުން ފާހަގަވި އެންމެ މުހިންމުއެއް ކަމަކީ ދިވެހިރާއްޖޭގެ ވިޔަފާރި ބަނދަރުތަކުގެ ސަލާމަތާއި ރައްކާތެރިކަން އިތުރުކުރުމަށް މިސަރުކާރުން ކުރި މުހިންމު މަސައްކަތްތަކެވެ.
ރިޔާސީ ބަޔާން އިއްވަވަމުން ރައީސް ޑރ. މުޢިއްޒު ވަނީ މިކަންކަމަށް އަލިއަޅުއްވާ ވަރަށް ތަފްސީލީ ގޮތެއްގައި ރާއްޖޭގެ ވިޔަފާރި ބަނދަރުތަކުގެ ސަލާމަތާއި ރައްކާތެރިކަން އިތުރުކުރުމަށް މިސަރުކާރުން ކުރިއަށް ގެންދެވުނުް ކަންކަން ހާމަކުރައްވާފައެވެ.
އެގޮތުން ވިޔަފާރި ބަނދަރުތަކުގެ ސަލާމަތާއި ރައްކާތެރިކަން ބަލަހައްޓާނެ ސަރުކާރުގެ އިދާރާއެއް މީގެ ކުރީން ނެތްކަން ފާހަގަކުރައްވާ އެމަނިކުފާނު ވިދާޅުވީ މިސަރުކާރުން އެކަން ނިމުމަކަށް ގެނެސްފައިވާކަމަށެވެ.
”ދިވެހިރާއްޖޭގެ ވިޔަފާރި ބަނދަރުތަކުގެ ސަލާމަތާއި ރައްކާތެރިކަން ބަލަހައްޓާނެ ސަރުކާރުގެ އިދާރާއެއް މީގެ ކުރީން ނެތުމުގެ ސަބަބުން ރާއްޖޭގެ ސަލާމަތާ ރައްކާތެރިކަން އެންމެ އެދެވޭ ގޮތުގައި ބެލެހެއްޓިފައި ނުވާ ކަމީ ފެންނަން އޮތް ޙަޤީޤަތެއް. އެހެން ކަމުން، މިކަން ނިމުމަކަށް ގެނެސް، މިނިސްޓްރީ އޮފް ޑިފެންސްގެ ދަށުން ހިނގަމުންދާ ”އޭވިއޭޝަން ސެކިއުރިޓީ ކޮމާންޑް“ގެ ނަން ”އޭވިއޭޝަން އެންޑް ޕޯޓް ސެކިއުރިޓީ ކޮމާންޑް“ގެ ނަމަށް ބަދަލުކޮށް، އެ އިދާރާގެ މަސައްކަތްތަކުގެ ތެރެއަށް ވިޔަފާރި ބަނދަރުތަކުގެ ސަލާމަތާއި ރައްކާތެރިކަން ބެލެހެއްޓުމުގެ މަސައްކަތްތައް އިތުރު ކޮށް، މާލޭ ކޮމަރޝަލް ހާބަރ އަދި ހުޅުމާލޭ އިންޓަރނޭޝަނަލް ޓަރމިނަލްއާއި ކުޅުދުއްފުށީ ރީޖަނަލް ޕޯޓާއި ހިތަދޫ ރީޖަނަލް ޕޯޓުގެ ސަލާމަތާއި ރައްކާތެރިކަން ބެލެހެއްޓުން ވާނީ ޙަވާލުކޮށްފައި“ ރައީސް
މިއާއިއެކު ރައީސް ވިދާޅުވީ އެ ބަދަލާ ގުޅިގެން އަލަށް އުފެދުނު އޭވިއޭޝަން އެންޑް ޕޯޓް ސެކިއުރިޓީ ކޮމާންޑަށް ބޭނުންވާ ވަސީލަތްތައް ސަރުކާރުން ދަނީ ވަރަށް އިސްކަމެއް ދީގެން ހަމަޖައްސައި ދެމުންކަމަށެވެ.
