މީޑިއާތަކަށް ޚާއްޞަކޮށްގެން ހުޅުމާލޭގައި ތަރައްޤީކުރާ މީޑިއާ ވިލެޖުގެ މަސައްކަތް ނިންމައި، މި އަހަރުގެ ތެރޭގައި އެތަނުގެ ބޭނުންކުރަން ފެށިގެންދާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މި އަހަރުގެ ރައްޔިތުންގެ މަޖިލީހުގެ ފުރުތަމަ ދައުރުގެ ފުރުތަމަ ޖަލްސާގައި ރިޔާސީ ބަޔާން އިއްވަވަމުން ރައީސް ވިދާޅުވީ، މީޑިއާ ވިލެޖުގެ މަޝްރޫއަކީ މީޑިއާތަކަށް ދިމާވެފައިވާ ދަތިތަކަށް ޙައްލެއް ހޯދައިދިނުމުގެ ގޮތުން ސަރުކާރުން ފަށައިގެން ކުރިއަށްގެންދާ ވަރަށް މުހިއްމު މަޝްރޫޢެއް ކަމަށެވެ.
އެގޮތުން މީޑިއާތަކުން ބޮޑެތި އަދަދުތަކުން ކުލި ދައްކައިގެން އަމިއްލަ ފަރާތްތަކުގެ ޢިމާރާތްތަކުގައި އޮފީސް އަދި ސްޓޫޑިއޯ ހިންގަން މަޖުބޫރުވެފައިވާ ކަމަށާއި ނަމަވެސް، މީޑިއާ ވިލެޖު ހުޅުވިގެން ދިއުމާއެކު، އޮފީހާއި ސްޓޫޑިއޯ ކުޑަ އަގެއްގައި ހިންގަން ލިބި، މީޑިއާތައް ކުރިއަރައިގެން ދިޔުމުގެ ފުރުޞަތު ފަހިވެގެންދާނެކަމަށް ރައީސް ވިދާޅުވިއެވެ.
ހުޅުމާލޭ ފުރުތަމަ ފިޔަވަހީގައި ތަރައްޤީކުރަމުންގެންދާ މީޑިއާ ވިލެޖަކީ ޖުމްލަ 34 ޖާގައިގެ ޢިމާރާތެކެވެ. މި ޢިމާރާތުގެ މަސައްކަތްތައް ބާރު ސްޕީޑެއްގައި ކުރިއަށްދާއިރު، މި ހިނގާ 2026 ވަނަ އަހަރުގެ ތެރޭގައި ޢިމާރާތުގެ ބޭނުން ހިފުމުގެ ފުރުޞަތު މީޑިއާތަކަށް ލިބިގެންދާނެކަމަށް ރައީސް ވިދާޅުވިއެވެ.
އެސްޓީއޯއިން މީގެ 17 އަހަރު ކުރިން ސިޓީ ހޮޓަލެއްގެ ގޮތުގައި ތަރައްޤީކުރަން ފެށި ޢިމާރާތުގައި މީޑިއާ ވިލެޖުގެ ހިންގަން ސަރުކާރުން ނިންމާފައިވާއިރު ވޯލްޑް އޮފް ބިޒްނަސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ މިދިޔަ އަހަރުގެ އޮގަސްޓު މަހުގެ ތެރޭގައި މި ޢިމާރާތުގެ މަސައްކަތްތައް ނިންމުމަށް ވަނީ ހަވާލުކޮށްފައެވެ.
