ނުކުޅެދުންތެރިކަން ހުންނަ ކުދިންނަށް ޚާއްޞަކޮށްގެން ހޯމް ސްކޫލިންގ ތަޢާރަފުކުރުމަށް މި އަހަރު މަޖިލީހަށް ބިލެއް ހުށަހަޅުއްވަން ނިންމާވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

Ads by

ރައީސް މުއިއްޒު މި މޭރުމުން ވިދާޅުވީ، ރައްޔިތުންގެ މަޖިލީހުގެ 2026 ވަނަ އަހަރުގެ ފުރުތަމަ ދައުރުގެ ފުރުތަމަ ޖަލްސާގައި ރިޔާސީ ބަޔާން އިއްވަމުންނެވެ. އެމަނިކުފާނު ވިދާޅުވީ، މި ސަރުކާރުގެ ސިޔާސަތަކީ ތަޢުލީމީ ދާއިރާގައި ވެސް ހަމަހަމަކަމާއި ޢަދުލު އިންސާފުން ތަޢުލީމް ފޯރުކޮށްދިނުން ކަމަށެވެ. ކުއްޖެއްގެ ކިބައިގައި ހުންނަ ނުކުޅެދުންތެރިކަމެއްގެ ސަބަބުން އެ ކުއްޖެއްގެ ހައްޤުތަކުން އެ ކުއްޖާ މަޙުރޫމު ނުވާނޭހެން ހަމަހަމަ ކަމާއެކު ހުރިހާ ދަރިވަރުން ޝާމިލުވާނޭހެން ކިޔަވައިދިނުމަކީ މި ސަރުކާރުގެ ސިޔާސަތު ކަމަށް އެމަނިކުފާނު ވިދާޅުވިއެވެ.

”ދިވެހި ކޮންމެ ކުއްޖެއް އަޅުގަނޑުގެ ކުރިމަތީގައި ހަމަހަމަ. އެ ކުއްޖެއްގެ ކިބައިގައި ހުންނަ ނުކުޅެދުންތެރި ކަމަކުން އެ ކުއްޖާގެ ހައްގުތަކުން އެ ކުއްޖާ މަހުރޫމްވެގެން ނުވާނެ. އެގޮތުން ހުރިހާ ދަރިވަރުން ޝާމިލްކޮށްގެން ކިޔަވައިދިނުމަކީ މި ސަރުކާރުގެ ސިޔާސަތު،“ — ރައީސް ވިދާޅުވިއެވެ.

ހުރިހާ ދަރިވަރުން ޝާމިލުކޮށްގެން ކިޔަވައިދިނުން މިހާރަށްވުރެ އިތުރަށް ހަރުދަނާކުރުމުގެ ގޮތުން ނުކުޅެދުންތެރިކަން ހުންނަ ކުދިންނަށް އުނގަންނައިދޭނެ މުދައްރިސުން ލިބުމުގެ ދަތިކަމަށް ދިމާވެފައިވާ މައްސަލަ ޙައްލުކޮށްދެއްވާނެކަމުގެ ޔަޤީންކަން ރައީސް ދެއްވެވިއެވެ. އެގޮތުން އެ ކުދިންނަށް އުނގަންނައިދޭނެ މުދައްރިސުން ތަމްރީނުކުރުމުގެ ޕްރޮގްރާމެއް ފަށާފައިވާއިރު މި ޕްރޮގްރާމު މިހާރަށްވުރެ އިތުރަށް ފުޅާކުރައްވާނެކަމަށް ރައީސް ވިދާޅުވިއެވެ.

ރައީސް ޑރ. މުޢިއްޒު އިތުރަށް ވިދާޅުވީ، ނުކުޅެދުންތެރިކަން ހުންނަ ކުދިން ބަލަހައްޓާ ބެލެނިވެރިންގެ ތެރެއިން، ސިވިލް ސަރވިސް ވަޒީފާއަދާކުރާ ބެލެނިވެރިންނަށް ގޭގައި ތިބެގެން ވަޒީފާ އަދާކުރުމުގެ ފުރުޞަތު މި އަހަރުގެ މާރިޗު މަހުން ފެށިގެން ލިބިގެންދާނެ ކަމަށެވެ.

ނުކުޅެދުންތެރިކަން ހުންނަ ކުދިންނަށް ޚާއްޞަކޮށްގެން މި ސަރުކާރުން ކުރަން ނިންމާފައިވާ ކަންކަން:

1. އުނގަންނައިދިނުމަށް ޚާއްޞަ ކުލާސްރޫމްތައް
2. ކުދިންގެ ޙާލަތަށް ރިޢާޔަތްކޮށް ޕްރައިވެސީ ލިބޭގޮތަށް ޚާއްޞަ ފާޚާނާ ހެދުން
3. ޚާއްޞަ އެޑިޔުކޭޝަނަލް ސަޕޯޓް ފެސިލިޓީތައް އެޅުން
4. ކުދިން އުނގެނުމަށާއި އުނގަންނައިދިނުމަށް ބޭނުންވާ ވަޞީލަތްތައް ފޯރުކޮށްދިނުމާއި، ސްކޫލްތަކަށް ބޭނުންވާ ވަޞީލަތްތައް ހޯދުން
5. އެކި މާއްދާތަކުގެ ޚާއްޞަ ފޮތްތައް ތައްޔާރުކުރުން
6. ކުދިންނަށް އެކަށީގެންވާ ގޮތެއްގައި އޯ ލެވެލްއަށް ކިޔެވޭނެ އިންތިޒާމުތައް ހަމަޖައްސައިދިނުން