ކުރީގެ ރައީސް އިބްރާހިމް މުޙައްމަދު ޞޯލިހުގެ ސަރުކާރުން ފޯޅަވަހި ދޫކޮށްލަން މޮރީޝަސްއަށް ފޮނުވިސިޓީ އަނބުރާ ގެނައިކަން ދަންނަވާ މޮރީޝަސްގެ ބޮޑުވަޒީރަށް ފޮނުވާ ސިޓީގައި ރައީސް މުޢިއްޒު ސޮއިކުރައްވައިފިއެވެ.
އެ ސިޓީ އަނބުރާ ގެނައިކަން ދަންނަވަން މޮރިޝަސްގެ ބޮޑުވަޒީރު، ޑރ. ނަވިންޗަންދްރާ ރަމްގޫލަމްއަށްއަށް ރައީސް ފޮނުވާ ސިޓީގައި އެމަނިކުފާނު ސޮއިކުރައްވާފައިވާކަން ރައީސް ޑރ. މުޢިއްޒު ވަނީ މި ނޫހަށް ކަށަވަރުކޮށްދެއްވާފައެވެ.
މިއަހަރުގެ ރިޔާސީ ބަޔާން އިއްވަވަމުން ރައީސް ވަނީ ފޯޅަވަހި މައްސަލައާ ގޮތުން ތަފްސީލީގޮތެއްގައި ވާހަކަ ދައްކަވާފައެވެ.
އެގޮތުން ނިމިދިޔަ އެމްޑީޕީ ސަރުކާރުގައި، ދިވެހިރާއްޖޭގެ ދެކުނުން ދިވެހި ރާއްޖޭގެ ހާއްސަ އިޤްތިޞާދީ ސަރަހައްދުން ބައެއް ފޯޅަވައްސާ ފުށުއަރާ ކަމަށް ބުނެ ރާއްޖެއާއި ދެކޮޅަށް މޮރިޝަސްއިން ހުށަހެޅި މައްސަލައިގައި ދިވެހި ސަރުކާރުން ބައިވެރިވެ، ރާއްޖޭން އީއީޒެޑްގެ ތެރެއިން ދެކުނު ސަރަހައްދުން ބޮޑު ބައެއް ދޫކޮށްލާފައިވާކަން ރައީސް ފާހަގަކުރެއްވިއެވެ.
މިއާއިއެކު ފޯޅަވަހީގެ މައްސަލާގައި މޮރިޝަސްގެ ބޮޑުވަޒީރަށް ކުރީގެ ރައީސް އިބްރާހިމް މުހައްމަދު ސޯލިހު ފޮނުއްވި ސިޓީ އަނބުރާ ގެނައުމަށް ނިންމާފައިވާ ކަމަށް ރައީސް، ޑރ. މުހައްމަދު މުއިއްޒު މިއަދުގެ ރިޔާސީ ބަޔާނުގައި އިއުލާނު ކުރެއްވިއެވެ. މިކަން އިއުލާނު ކުރެއްވި ވަގުތު މަޖްލީސް ތަޅުމުގައި ތިއްބެވި އެމްޑީޕީގެ މަދު މެންބަރުން ގެންދެވީ އަޑުގަދަކޮށް ހުރަސް އަޅަމުންނެވެ.
ރައްޔިތުންގެ މަޖިލީހުގައި ރިޔާސީ ބަޔާން އިއްވަވަމުން ރައީސް ޑރ. މުޢިއްޒު ވިދާޅުވީ، އެމަނިކުފާނު ގަބޫލު ކުރައްވާ ގޮތުގައި ދިވެހީންގެ ބިމުން ވެލިފުކެއްގެ މިންވަރު ވެސް، ދިވެހީންގެ އިމުން ޒައްރެއްގެ މިންވަރު ވެސް ދޫކޮށްލައިގެން ނުވާނެ ކަމަށެވެ.
