މާލޭ ސަރަޙައްދުގައި ދެ ލޯންޗެއް ޖެހި ހިނގި ކަނޑުމަތީގެ އެކްސިޑެންޓުގައި އެއްވެސް މީހަކަށް ބޮޑު އަނިޔާއެއް ލިބިފައިނުވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.
މިކަމާ ގުޅިގެން ފުލުހުން ބުނެފައިވަނީ، ދެ ލޯންޗެއް ޖެހި އެކްސިޑެންޓެއްވުމާ ގުޅިގެން އެ ސަރަޙައްދުގައި ފުލުހުން ހަރަކާތްތެރިވަމުންދާ ކަމަށެވެ. އެ ލޯންޗުން ދަތުރުކުރި އެއްވެސް މީހަކަށް ބޮޑު އަނިޔާއެއް ނުވި ނަމަވެސް، ދެ ލޯންޗަށް އެކިވަރުގެ ގެއްލުންތައް ލިބިފައިވާ ކަމަށް ފުލުހުން ވަނީ ބުނެފައެވެ.
މަޢުލޫމާތު ލިބިފައިވާ ގޮތުގައި އެކްސިޑެންޓްވި އެއް ލޯންޗަކީ މާލެ އާއި ކ. މާފުއްޓާ ދެމެދު ދަތުރުކުރާ އެސްކޭޕް ލޯންޗެވެ. އެކްސިޑެންޓް ހިނގީ އެސްކޭޕް ލޯންޗުގެ ފަހަތުކޮޅުގައި އެހެން ލޯންޗަކުން ޖެހިގެންނެވެ.
މި ހާދިސާ ހިނގާފައިވަނީ މިރޭ 21:05 އެހައިކަންހާއިރު މާލެއާ ތިލަފުއްޓާ ދެމެދުގައި އެ ދެ ލޯންޗު ދަތުރުކުރަމުން ދަނިކޮށެވެ. އެކްސިޑެންޓުގައި ހިމެނޭ އެއް ލޯންޗުގައި 21 މީހުން އަދި އަނެއް ލޯންޗުގައި ދެ މީހުން ދަތުރުކޮށްފައިވެއެވެ.
ފުލުހުން ގެންދަނީ މި މައްސަލަ އިތުރަށް ތަޙުޤީޤުކުރަމުންނެވެ.
