ރާއްޖެއަށް މުދާ އެތެރެކުރުމާއި ބޭރުކުރުމުގެ މަސައްކަތުގައި ހަރަކާތްތެރިވާ ފަރާތްތަކަށް ދިމާވާ ދަތިތައް ދެނެގަނެ، އެކަންކަމަށް ހައްލު ހޯދުމަށްޓަކައި ކަމާގުޅުންހުރި އިދާރާތަކާއި މަސައްކަތުގެ ބައިވެރިން ހިމެނޭ ގޮތަށް ޚާއްސަ ފޯރަމެއް ބާއްވައިފިއެވެ.
ކަސްޓަމްސް ބިލްޑިންގްގައި ބޭއްވި މި ފޯރަމަކީ ރާއްޖޭގެ އިގްތިސާދީ މައިދާނުގައި މުދާ އެތެރެކުރުމާއި ބޭރުކުރުމުގެ ދާއިރާގައި ހަރަކާތްތެރިވާ ފަރާތްތަކަށް ކުރިމަތިވާ ހުރަސްތައް ނައްތާލުމަށް ސަރުކާރުން ކުރަމުންދާ މަސައްކަތުގެ ތެރެއިން ބޭއްވި ފޯރަމެކެވެ.
އެއް ދުވަހުގެ މުއްދަތަށް ކުރިއަށްގެންދިޔަ މި ބައްދަލުވުމުގައި ކަސްޓަމްސް، ބަނދަރުތަކާ ބެހޭ އިދާރާތައް، މުދާ ކްލިއަރކުރުމުގައި ހަރަކާތްތެރިވާ އެޖެންޓުންނާއި ބްރޯކަރުންގެ އިތުރުން، މުދަލާގުޅޭ ހުއްދަތައް ދޫކުރާ ސަރުކާރުގެ އެކި އިދާރާތައް ހިމެނޭހެން 60 އަށް ވުރެ ގިނަ ފަރާތުން ބައިވެރިވެފައިވެއެވެ.
މި ފޯރަމްގައި ބައިވެރިން ވަނީ މުދާ އެތެރެކޮށް ބޭރުކުރުމުގައި ދިމާވާ ދަތިތަކާ ގުޅޭގޮތުން ވަރަށް ފުޅާ ދާއިރާއެއްގައި މަޝްވަރާކޮށްފައެވެ. ޚާއްސަކޮށް، ރާއްޖެއަށް އިމްޕޯޓްކުރާ ކެމިކަލްގެ ބާވަތްތަކަށް ހުއްދަ ދޫކުރުމުގެ މަރުހަލާތަކާއި، ކާބޯތަކެއްޗާއި ބޭހުގެ ބާވަތްތައް ކްލިއަރކުރުމުގައި ހުރި ދަތިތަކަށް ގެނެވިދާނެ ހައްލުތަކާ ގުޅޭގޮތުން ޚިޔާލު ބަދަލުކުރެވުނެވެ. މީގެ އިތުރުން، ގަސްގަހާގެއްސާއި ޖަނަވާރުގެ ބާވަތްތައް އެތެރެކުރުން މިހާރަށްވުރެ ފަސޭހަކުރުމަށާއި، އިމާރާތްކުރުމުގެ ސާމާނު އެތެރެކުރުމަށް ދޫކުރާ ހުއްދަތަކުގެ އުޞޫލުތައް ލުއިކުރުމާ ގުޅޭގޮތުންވެސް ފޯރަމްގެ ބައިވެރިން މަޝްވަރާކުރިއެވެ.
މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ މިހާރުން މިހާރަށް އެޅެންހުރި ފިޔަވަޅުތަކުގެ އިތުރުން، މެދުރާސްތާ އާއި ދިގުރާސްތާގައި ގެނެވޭނެ ދާއިމީ ހައްލުތަކަށެވެ. ފޯރަމް ނިންމާލާފައިވަނީ މި މަޝްވަރާތަކުން ފާހަގަވި ކަންކަން ކަމާގުޅުންހުރި ސަރުކާރުގެ އިދާރާތަކާ ހިއްސާކޮށް، ކަނޑައެޅޭ ވަކި ތާވަލެއްގެ ދަށުން އެކަންކަން ތަންފީޒުކުރުމަށް ނިންމަމުންނެވެ.
މި ފޯރަމްގެ ސަބަބުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވިޔަފާރިވެރިންނަށް ފަހި މާހައުލެއް ގާއިމުކޮށްދިނުމަށް ކުރާ މަސައްކަތަށް އިތުރު ކުރިއެރުމެއް ލިބިގެންދާނެ ކަމަށް ބެލެވެއެވެ.
