ސާފް ފުޓްސަލް ޗެމްޕިއަންޝިޕްގައި ރާއްޖެއަށް ލިބުނު ކާމިޔާބީގެ މައިގަނޑު ސަބަބަކީ ވަރަށް ބޮޑަށް ޓީމު އެކުލަވާލާ ޓީމު ވޯކް ރަނގަޅުކުރެވުން ކަމަށް ޤައުމީ ޓީމުގެ ކެޕްޓަން މުޙައްމަދު އިމްރާން ބުނެފިއެވެ.
އިމްރާން މި މޭރުމުން ބުނީ، ޤައުމީ ފުޓްސަލް ޓީމާއި އެކު ޕީއެސްއެމްއިން ކުރިޔަށް ގެންދިޔަ ޚާއްޞަ ޕްރޮގްރާމެއްގައި ވާހަކަ ދައްކަމުންނެވެ. އިމްރާން ބުނީ، ހުރިހާ ކުޅުންތެރިން އުޅުނީ ވަރަށް އެއްކޮށް ކަމަށާއި، ޗައިނާއަށް ދިޔަ ހިސާބުން ފެށިގެންވެސް ޓީމެއް ގޮތަށް އެއްކޮށް މަސައްކަތް ކުރެވުނު ކަމަށެވެ.
ޤައުމީ ޓީމުގެ ކުޅުންތެރިން ތައިލޭންޑަށް ދިއުމުގެ ކުރިން ޗައިނާގައި 10 ދުވަހުގެ ކޭމްޕެއް ކޮށްފައިވާއިރު، މި ކޭމްޕްގެ ސަބަބުން ވަރަށް ގިނަ ކަންކަން ދަސްވި ކަމަށާއި، ޓީމުގެ ހުރިހާ ކުޅުންތެރިންގެ އެކުވެރިކަން އާލާވެ އެންމެން އެކަތިގަނޑެއްގެ ގޮތުގައި މަސައްކަތް ކުރުމުގެ ރޫޙު އާލާވެގެންދިޔަ ކަން އިމްރާން ފާހަގަކުރިއެވެ. މީގެ އިތުރުން، ޗައިނާގައި ހޭދަވި ދުވަސްތަކަކީ މުހިންމު ދުވަސްތަކެއްކަން ފާހަގަކުރަމުން އިމްރާން ބުނީ، ޗައިނާގެ އިންޑޯގައި ފަރިތަކުރުންތައް ބާއްވާ ޓީމުގެ ހުރިހާ ކުޅުންތެރިންނަށް ބޮޑު ތަޖުރިބާއެއް ކޭމްޕުން ލިބިގެން ދިޔަ ކަމަށާއި، ޗައިނާގެ ޤައުމީ ޓީމާއެކު މެޗުތަކެއް ކުޅެން ފުރުޞަތު ލިބިގެން ދިއުމަކީ ބޮޑު ހިތްހަމަ ޖެހުމެއް ކަމަށެވެ.
އެ ކޭމްޕުން ފެށިގެން ޓީމު ވޯކް ބިލްޑް ކުރުން މިއީ ޓީމަށް ލިބުނު ވަރަށް ބޮޑު އެޑްވާންޓޭޖެއް ކަމުގައި އިމްރާން ވަނީ ސިފަކޮށްފައެވެ.
ސާފް ފުޓްސަލްގެ ފުރިހަމަ ކާމިޔާބީގައި އިމްރާނަކީ މުހިންމު ކުޅުންތެރިއެއްކަން ފާހަގަކޮށްލެވެއެވެ. އޭނާއަކީ މުޅި މުބާރާތުގެ ޓޮޕް ސްކޯރާގެ މަޤާމުވެސް ހޯދި ކުޅުންތެރިޔާއެވެ. ކުޅުނު ހުރިހާ މެޗަކުން މޮޅުވެ ސާފްގެ ތަށި އުފުލާލުމުން ރާއްޖެއަށް ވަނީ ސަރަހައްދީ އެހެން ޤައުމުތަކުގެ ލޯތައް އަމާޒުވެފައެވެ.
