މި މަހުގެ 12 ވަނަ ދުވަހުގެ ކުރިން ސަރުކާރުގެ އޮފީސްތަކުގެ މުވައްޒަފުންނަށް ރަމަޟާން މަހުގެ ޢިނާޔަތް ދޫކުރުމަށް ފިނޭންސް މިނިސްޓްރީން ނިންމައިފިއެވެ.
ފިނޭންސް މިނިސްޓްރީން މި ނިންމުން ނިންމާފައި މިވަނީ މި އަހަރުގެ ރަމަޟާން މަސް ފެށޭ ދުވަހަކީ މި މަހުގެ 18 ވަނަ ދުވަސް ކަމަށްވާތީއެވެ. އެ މިނިސްޓްރީން މިއަދު ނެރުނު ސަރކިއުލާއެއްގައި ސަރުކާރުގެ އޮފީސްތަކުގެ މުވައްޒަފުންނަށް ރަމަޟާން މަހުގެ ޢިނާޔަތް ދިނުމުގައި ޢަމަލުކުރާނެ ގޮތުގެ އުޞޫލުތައް ވަނީ ބަޔާންކޮށްފައެވެ.
އެ އުޞޫލުގައިވާ ގޮތުން، ސަރުކާރުގެ މުވައްޒަފުންނަށް ރަމަޟާން މަހުގެ ޢިނާޔަތް ދީ، މި މަހުގެ 12 ވަނަ ދުވަހުގެ ކުރިން ނިންމަން ޖެހޭނެއެވެ. މީގެ އިތުރުން ރަމަޟާން މަހުގެ ޢިނާޔަތުގެ ފައިސާ މި މަހުގެ 10 ވަނަ ދުވަހުގެ ކުރިން ޕަބްލިކް އެކައުންޓިންގ ސިސްޓަމަށް އަޕްލޯޑުކޮށް، ޕޯސްޓު ކުރަން ވާނެ ކަމަށްވެސް އެ ސަރކިއުލާގައި އަންގާފައިވެއެވެ.
ފިނޭންސް މިނިސްޓްރީގެ ސަރކިއުލާގައިވާ ގޮތުން، މުސާރަ ލިބޭ ގޮތަށް އެއް ވަޒީފާއަށް ވުރެ ގިނަ ވަޒީފާ އަދާކުރާ މުވައްޒަފުންނަށް ރަމަޟާން މަހުގެ ޢިނާޔަތުގެ ފައިސާ ދޭއިރު، އެ މުވައްޒަފަކު އަސާސީ ވަޒީފާ އަދާކުރާ އޮފީހަކުން ހަމައެކަނި އެ ޢިނާޔަތް ދޭންޖެހޭނެއެވެ. އަދިހަމައެހެންމެ، ރަމަޟާން މަސް ފެށޭއިރު އެ އޮފީހަކަށް ޚިދުމަތް ނުލިބޭ ގޮތަށް، ޕޭ ލީވް އަދި ނޯ ޕޭ ލީވް މުވައްޒަފުން، ޢިނާޔަތް ލިބޭ މުވައްޒަފުންގެ ތެރޭގައި ނުހިމެނުން ހިމެނެއެވެ.
އެފަދަ ލީވެއްގައި ހުރި މުވައްޒަފަކު ރަމަޟާން މަހުގެ ތެރޭގައި ވަޒީފާއަށް ނުކުމެއްޖެ ނަމަ އެ ދުވަހަކުން ފެށިގެން ރަމަޟާން މަހުގެ ނިޔަލަށް ޖެހޭ އަދަދެއް ބަލައި، އެ އަދަދަށް އިނާޔަތުގެ ފައިސާ ދޭންޖެހޭނެއެވެ.
ވަޒީފާއާ ބެހޭ ޤާނޫނުގައިވާ ގޮތުން، ރާއްޖޭގައި ވަޒީފާ އަދާކުރާ ކޮންމެ މުސްލިމް މުވައްޒަފަކަށް ރަމަޟާން މަހުގެ ޢިނާޔަތުގެ ގޮތުގައި މަދުވެގެން 3،000 ރުފިޔާ ދޭން ޖެހޭނެއެވެ.
