ހުވަދުއަތޮޅު ދެކުނުބުރީ ފިޔޯރީގައި ގާއިމުކުރުމަށް ހަމަޖެހިފައިވާ، ދަޅުގައި މަސް ބަންދުކުރާ ކާރުޚާނާގެ ބިން ހިއްކުމާއި ބަނދަރު ހެދުމުގެ ޢަމަލީ މަސައްކަތް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ރަސްމީކޮށް އިފްތިތާހުކޮށް ދެއްވައިފިއެވެ.
މި މަޝްރޫޢު ފެށުމުގެ ގޮތުން ފިޔޯރީގައި ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ވިދާޅުވީ، މިއީ ފިޔޯރީގެ އިތުރުން މުޅި ހުވަދުއަތޮޅުގެ މަސްވެރި އާއިލާތަކަށް އުޖާލާ މުސްތަޤުބަލަކަށް މަގުފަހިކޮށްދޭނެ މުހިންމު މަޝްރޫޢެއް ކަމަށެވެ. އަދި މި މަޝްރޫޢުގެ ސަބަބުން ސަރަހައްދީ ތަރައްޤީއާއި އިޤްތިޞާދީ ފުދުންތެރިކަން އިތުރުވެގެންދާނެކަން އެމަނިކުފާނު ފާހަގަކުރެއްވިއެވެ.
ނައިބު ރައީސްގެ ވާހަކަފުޅުގައި، މި މަޝްރޫޢު ފިޔޯރީގައި ކުރިޔަށް ގެންދިޔުމަށް ހުށަހެޅި ހުށަހެޅުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ޚާއްޞަ އިސްކަމަށްޓަކައި އެމަނިކުފާނަށް ޝުކުރު އަދާކުރެއްވިއެވެ. ހުވަދުއަތޮޅަކީ ދޮށީގެ މަސްވެރިކަން ފުޅާ ދާއިރާއެއްގައި ކުރަމުންދާ ސަރަހައްދަކަށް ވެފައި، ބާނާ މަސް ކޫއްޑޫގައި އެކަނި ބަންދުކުރެވެން ނެތުމުން، މިފަދަ ކާރުޚާނާއެއް ބިނާކުރަން އެންމެ އެކަށީގެންވާ ތަނަކީ ފިޔޯރީ ކަމުގައި ސަރުކާރުން ނިންމެވި ސަބަބުވެސް އެމަނިކުފާނު ހާމަކުރެއްވިއެވެ.
ފިޔޯރީގެ ރައްޔިތުންނަކީ ތަރައްޤީއަށް ލޯބިކުރާ، އަމިއްލަވަންތަކަން ދަމަހައްޓާ ބައެއްކަން ފާހަގަކުރައްވައި، މި ކާރުޚާނާއާއެކު މުޅި އަތޮޅަށް ވަޒީފާގެ ގިނަ ފުރުސަތުތަކެއް ހުޅުވިގެންދާނެ ކަމަށް ނައިބު ރައީސް ވިދާޅުވިއެވެ. އެހެންކަމުން، މަސްވެރިކަމުގެ ދާއިރާއަށް އިތުރު އުޅަނދުތައް ނެރެ، ޒުވާނުން މި ދާއިރާގައި ޝާމިލުވުމަށް އެމަނިކުފާނު ވަނީ އިލްތިމާސްކުރައްވާފައެވެ.
މި މަޝްރޫޢުގެ ޢަމަލީ މަސައްކަތް ފެށިއިރު، ސަރުކާރުން ވަނީ މަޝްރޫޢުގެ ފަރުމާއަށް ބޮޑެތި ބަދަލުތަކެއް ގެނެސްފައެވެ. އެގޮތުން ކުރިން ރޭވިފައި އޮތް 1500 މެޓްރިކް ޓަނުގެ ކޯލްޑް ސްޓޯރޭޖް، 3000 މެޓްރިކް ޓަނަށް ވަނީ ބޮޑުކޮށްފައެވެ. މީގެ އިތުރުން ދުވާލަކު 100 ޓަނުގެ މަސް ބަންދުކުރާ ކާރުޚާނާއަކާއި، 100 ޓަނުގެ ފިޝްމީލް ޕްލާންޓެއްވެސް މި މަޝްރޫޢުގެ ދަށުން ގާއިމުކުރުމަށް ވަނީ ހަމަޖެހިފައެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބުގެ އަރިހުގައި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމާއި، ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބުގެ އިތުރުން ފަރެސްމާތޮޑާ ދާއިރާގެ މަޖިލިސް މެމްބަރު އަޝްރަފް ރަޝީދު ބައިވެރިވެވަޑައިގެންނެވިއެވެ.
