ކ. ތިލަފުށީ ވެމްކޯ ވޯކް ސައިޓެއްގައި ބިދޭސީއަކު ނިޔާވެފައި އޮއްވާ ފެނުނު މައްސަލައާ ގުޅިގެން ހައްޔަރުކުރި ސްރީލަންކާގެ މީހާއަށް ކްރިމިނަލް ކޯޓުން، ގަސްދަކާނުލައި މީހަކު މެރުމުގެ ކުށުގެ ތުހުމަތުކޮށްފިއެވެ.
ބަންގްލަދޭޝަށް ނިސްބަތްވާ އުމުރުން 24 އަހަރުގެ އަމީން މިއާ ނިޔާވެފައި އޮއްވާ ފެނުނު މައްސަލައާ ގުޅިގެން ހައްޔަރުކުރީ ސްރީލަންކާއަށް ނިސްބަތްވާ 32 އަހަރުގެ ހެޝަން މަދުރަންގަ ޑިސަނަޔަކަ މެނިކެވެ. އަމީން މިއާ ނިޔާވެފައި އޮއްވާ ފެނުނީ، މިދިޔަ މަހުގެ 26 ވަނަ ދުވަހު އޭނާ ގެއްލިގެން ފުލުހުންނަށް ރިޕޯޓުކުރުމާ ގުޅިގެން ހޯދުމުގެ މަސައްކަތް ކުރަމުން އަންނަނިކޮށް މިދިޔަ މަހުގެ 28 ވަނަ ދުވަހުއެވެ.
މި މައްސަލައާ ގުޅިގެން ހެޝަން މަދުރަންގަ ޑިސަނަޔަކަ މެނިކެގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާ ހަތް ދުވަހަށް ބަންދުކުރުމަށް އަމުރުކޮށްފައެވެ. ކްރިމިނަލް ކޯޓުން އޭނާގެ މައްޗަށް ކުރަނީ ގަސްދަކާނުލައި މީހަކު މެރުމުގެ ތުހުމަތެވެ. އެ ތުހުމަތު ކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށާއި އޭގެ ތެރޭގައި ހާދިސާ ރިޕޯޓާއި ސީސީޓީވީ ސްނެޕްޝޮޓްތަކެއް ހުރިކަން އަމުރުގައި ފާހަގަކޮށްފައިވެއެވެ.
ފުލުހުން މީގެ ކުރިން ބުނެފައިވާ ގޮތުގައި، އަމީން މިއާ ނިޔާވެފައިވަނީ ގައިގައި އެކްސްކެވޭޓަރުން ޖެހި ވެއްޓުމުން ކުނިތަކާ އެކު އެހެން ދިމާލަކަށް ބަދަލުކުރެވި ކުނިތައް ގައިމައްޗަށް އެޅިގެން ކަމަށް މިހާތަނަށް ލިބުނު މައުލޫމާތުން އެނގޭ ކަމަަށެވެ. ފުލުހުން އެހެން ބުނެފައިވީ ނަމަވެސް އެއީ އެކްސްކަވޭޓަރު ދުއްވަން ހުރި ސްރީލަންކާ ޑްރައިވަރަށް އެނގިގެން ހިނގި ހާދިސާއެއް ކަމެއް މިހާތަނަށް ކަށަވަރުވެފައެއް ނުވެއެވެ.
ހާދިސާ ހިނގި ސަރަހައްދު ފެންނަ ސީސީޓީވީ ފުޓޭޖުން އެނގޭ ގޮތުގައި، އެކްސްކެވޭޓަރުގެ ދަތްގަނޑުން އަމީން މިއާ ގައިގައި ޖެހުނު ނަމަވެސް މެދުކެނޑުމެއް ނެތި، މަސައްކަތް ކުރިއަށް ގެންގޮސްފައިވާ ކަމަށް ފުލުހުން އިތުރަށް ބުންޏެވެ.
