މި އަހަރުގެ ޓީ- ޓްވެންޓީ ކްރިކެޓް މުބާރާތުގައި އިންޑިއާ އާއި ދެކޮޅަށް ކުޅޭ މެޗު ނުކުޅެ، މެޗް ބޮއިކޮޓްކުރަން ނިންމާ އެކަން ޕާކިސްތާން ސަރުކާރުން އިއުލާނު ކޮށްފި އެވެ.
ޕާކިސްތާން ސަރުކާރުގެ ރަސްމީ އެކްސް އެކައުންޓް މެދުވެރިކޮށް ނެރުނު ބަޔާނުގައިވަނީ އިންޑިއާ އާއި ސްރީލަންކާގައި އަންނަ ހޮނިހިރު ދުވަހު ފަށާ މުބާރާތުގައި އެގައުމު ބައިވެރިވާނެ ކަމަށެވެ. ނަމަވެސް މި މަހުގެ 15 ވަނަ ދުވަހު އިންޑިއާއާ ދެކޮޅަށް ކުޅޭ މެޗަށް ޕާކިސްތާން ޓީމު ދަނޑަށް ނުނުކުންނާނެ ކަމަށެވެ. މިގޮތަށް ނިންމި ސަބަބެއް ޕާކިސްތާނުން ހާމަކޮށްފައެއް ނުވެއެވެ.
The Government of the Islamic Republic of Pakistan grants approval to the Pakistan Cricket Team to participate in the ICC World T20 2026, however, the Pakistan Cricket Team shall not take the field in the match scheduled on 15th February 2026 against India.
— Government of Pakistan (@GovtofPakistan) February 1, 2026
ޕާކިސްތާނުގެ ނިންމުން މިއައީ ފެބްރުއަރީ ހަތަކުން މާޗު މަހުގެ އަށް ވަނަ ދުވަހުގެ ނިޔަކަށް ބާއްވާ މުބާރާތުގައި ކަންކުރާނެ ގޮތަކާމެދު އެ ގައުމުގެ ކްރިކެޓް ބޯޑުގެ ރައީސް އަދި އިންޓީރިއާ މިނިސްޓަރު މޮހްސިން ނަގްވީ ވަނީ މިދިޔަ ހަފުތާގައި ބޮޑު ވަޒީރު މުހައްމަދު ޝާހްބާޒް ޝަރީފާ ވެސް ބައްދަލުކޮށްފައިވަނިކޮށެވެ. އޭގެ ފަހުން މިކަމާމެދު ޕާކިސްތާނު ސަރުކާރުގެ އެންމެ އިސްވެރިންގެ މެދުގައި މިއަދު ވަނީ ސީރިއަސް މަޝްވަރާތަކެއް ކޮށްފަ އެވެ.
އިންޑިއާގެ މީޑިއާތަކުން ބުނަނީ މިއީ ބަލޯކިސްތާނަށް ދާދި ފަހުން ދިން ޓެރަރިސްޓް ހަމަލާއާ އިންޑިއާ އާއި ގުޅުވައި ޕާކިސްތާނުން ނިންމި ނިންމުމެއް ކަމަށެވެ. އަދި މިއީ އިންޑިއާގައި މުބާރާތް ނުކުޅެން ވެގެން މުބާރާތުން ވަކިވި ބަނގްލަދޭޝް އަށް ތާއީދު ކުރުމުގެ ގޮތުން ޕާކިސްތާނުން ކުރި ކަމެއް ކަމަށްވެސް ތުހުމަތު ކުރެއެވެ.
ޕާކިސްތާނުން ކުރިން ވިސްނަމުން ދިޔައީ މުބާރާތުގައި ބައިވެރި ނުވުމަށެވެ. ސަބަބެއް ކަމުގައި ބުނެފައިވަނީ އިންޓަނޭޝަނަލް ކްރިކެޓް ކައުންސިލް (އައިސީސީ) އިން އިންޑިޔާ ބޭނުންހާ ގޮތަށް ކަންތައްތައް ކުރަމުންދާތީ ކަމަށެވެ.
ޕާކިސްތާނުގެ މި ނިންމުމާއެކު އެ ގައުމަށް ގްރޫޕް ސްޓޭޖުގެ ދެ ޕޮއިންޓް ގެއްލޭނެ އެވެ. ގްރޫޕް އޭގައި ހިމެނެނީ އިންޑިޔާ އާއި ޕާކިސްތާނާއި ނެމީބިއާ އާއި ނެދަލޭންޑްސް އާއި އެމެރިކާ އެވެ. މި ޓީމުތަކަށް ބަލާއިރު އިންޑިޔާ މެޗު ދޫކޮށްލާފައި ވެސް ޕާކިސްތާނަށް ދެ ވަނަ ބުރަށް ދިއުމަށް ހުރަސްއެޅޭ ވަރުގެ ގަދަ ޓީމެއް ނެތެވެ.
