އިންތިޚާބަކާ ނުލައި 2 ދާއިރާއެއްގެ ކައުންސިލް ރައީސްގެ ގޮނޑި އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައެއް ގޮނޑިތައް ވެރިކަން ކުރާ ޕީއެންސީއަށް ލިބިއްޖެއެވެ.
ޕީއެންސީއަށް ކަށަވަރުވެފައި މިވަނީ އދ. ދިއްދޫ އަދި އދ. މަންދޫ ކައުންސިލް ރައީސްގެ ގޮނޑި އެވެ.
މަޢުލޫމާތު ލިބޭގޮތުގައި ދިއްދޫ އަދި މަންދޫ ކައުންސިލްގެ ރައީސްގެ ގޮނޑި، ޕީއެންސީއަށް ލިބުނީ އެ ގޮނޑިތަކަށް އިތުރު ބަޔަކު ކުރިމަތިލާފައި ނުވާތީއެވެ. އެ ދެ ގޮނޑީގެ އިތުރުން ދެ ރަށުގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ގޮނޑިތަކެއް ވެސް ޕީއެންސީއަށް ވަނީ ކަށަވަރުވެފައެވެ. އެ ގޮނޑިތައް ވެސް ޕީއެންސީން ނެގީ އެ ޕާޓީ ފިޔަވައި އެއްވެސް ކެންޑިޑޭޓަކު ގޮނޑިތަކަށް ކުރިމަތިލާފައި ނުވުމުން އިންތިޚާބަކާ ނުލައެވެ.
”އެކިއެމްވީ“ އަށް މައުލޫމާތު ދެމުން ދިއްދޫ ޕީއެންސީ މެންބަރަކު ވިދާޅުވީ މި ގޮނޑިތައް ކަށަވަރުވެފައިވަނީ އިތުރު ބަޔަކު ކުރިމަތިލާފައި ނުވުމުންނެވެ. އަދި ކައުންސިލް އިންތިޚާބުގައި ދިއްދޫގެ މެޖޯރިޓީ ސަރުކާރަށް ނަގައިދޭނެ ކަމަށްވެސް އޭނާ ޔަޤީންކަން ދެއްވިއެވެ.
މިކަމާގުޅޭ އިތުރު ތަފްސީލެއް އިލެކްޝަންސް ކޮމިޝަނުންވެސް އަދި ޕީއެންސީވެސް ހާމަކޮށްފައެއް ނުވެއެވެ.
