ނިމިދިޔަ ޖެނުއަރީ މަހު ރެކޯޑް ޢަދަދަކަށް ފަތުރުވެރިން ރާއްޖެއަށް ޒިޔާރަތްކޮށްފިއެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާގޮތުގައި، މިދިޔަ ޖެނުއަރީ މަހު ރާއްޖެއަށް ޒިޔާރަތްކުރީ 224,788 ފަތުރުވެރިންނެވެ. އޭގެ ކުރީ އަހަރުގެ ޖެނުއަރީ މަހު ރާއްޖެއަށް ޒިޔާރަތްކޮށްފައިވަނީ 214,863 ފަތުރުވެރިންނެވެ. އެހެންކަމުން މިއީ 4.6 އިންސައްތައިގެ ކުރިއެރުމެކެވެ. މީގެ ކުރިން އެއް މަސް ދުވަހުން ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ މިދިޔަ ޑިސެމްބަރު މަހުގައެވެ. އެ މަހު ރާއްޖެއަށް ޒިޔާރަތްކޮށްފައިވަނީ 224،455 ފަތުރުވެރިންނެވެ.
މިކަމާ ގުޅިގެން ޓޫރިޒަމް މިނިސްޓަރު ޠާރިޤު އިބްރާހީމް ވިދާޅުވީ، ފަތުރުވެރިންގެ ޢަދަދަށް މި ލިބުނު ކުރިއެރުމާއެކު މި އަހަރު ފެށިގެން މި ދިޔައީ ވަރަށް އުއްމީދީ އަހަރެއްގެ ގޮތުގައި ކަމަށެވެ. އަދި މިއީ ފަތުރުވެރިކަމުގެ މުޅި ސިނާޢަތުގެ އެންމެން ގުޅިގެން ކުރި މަސައްކަތުގެ ނަތީޖާ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ފަތުރުވެރިންގެ ޢަދަދުތަކަށް ލިބެމުން މިދާ ކުރިއެރުންތަކުން ދައްކުވައިދެނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ސިނާޢަތް ކުރިއަރުވައި، މި ސިނާޢަތުން ލިބޭ މަންފާ ހުރިހާ ރައްޔިތުންނަށް ލިބޭނެ މަގު ތަނަވަސްކޮށްދެއްވުމަށް ކުރައްވާ މަސައްކަތްތައް ޙާޞިލުވަމުންދާ މަންޒަރު ކަމަށެވެ.
ފާހަގަކޮށްލެވޭ ގޮތުގައި، ޖެނުއަރީ މަހު އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިއާއިންނެވެ. އެ ޤަޢުމުން 29,370 ފަތުރުވެރިން ޒިޔާރަތްކޮށްފައިވާއިރު، ދެވަނައަށް އޮތް އިޓަލީ ވިލާތުން 23,171 ފަތުރުވެރިން އަދި ތިންވަނައަށް އޮތް ޗައިނާއިން 22,676 ފަތުރުވެރިން ވަނީ ޒިޔާރަތްކޮށްފައެވެ.
މިދިޔަ މަހުގެ ތެރޭގައި އެންމެ ގިނަ ފަތުރުވެރިން އެއް ދުވަހެއްގެ ތެރޭގައި ޒިޔާރަތްކޮށްފައިވަނީ މިދިޔަ މަހުގެ 11 ވަނަ ދުވަހުއެވެ. އެ ދުވަހު އެކަނިވެސް ޖުމްލަ 9,596 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މިހާރު ރާއްޖެއަށް އެވްރެޖް ގޮތެއްގައި ކޮންމެ ދުވަހަކު ޒިޔާރަތްކުރަނީ 7,251 ފަތުރުވެރިންނެވެ.
