މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކުރިއަށް ގެންދިޔަ ލޭ ހަދިޔާކުރުމުގެ ކޭމްޕް ކާމިޔާބުކަމާއެކު ނިންމާލައިފިއެވެ.
ވެލާނާ އިންޓަނޭޝަނަލް އެއަރޕޯޓުގައި ހުންނަ އެއަރޕޯޓް ރެކްރިއޭޝަން ސެންޓަރު (އޭއާރުސީ)ގައި ދެ ދުވަހުގެ މުއްދަތަކަށް ކުރިއަށް ގެންދިޔަ މި ކޭމްޕަކީ އެމްއޭސީއެލްގެ އިޖުތިމާޢީ ޒިންމާގެ ދަށުން ކޮންމެ އަހަރަކުވެސް ކުރިއަށް ގެންދާ ޕްރޮގްރާމެއް ކަމަށް އެ ކުންފުނިން ބުންޏެވެ.
އެހެން އަހަރުތަކާ ޚިލާފަށް މި އަހަރުގެ ކޭމްޕް ކުރިއަށް ގެންދަނީ މުޅި ވެލާނާ އިންޓަރނޭޝަނަލް އެއަރޕޯޓް (ވީއައިއޭ) އަށް ހުޅުވާލައިގެންނެވެ. މީގެ މަޤުޞަދަކީ ލޭ ލިބުން ދަތިވެ, އެމްބީއެސް އިން އާންމުންގެ އެހީތެރިކަމަށް އެދިފައިވާތީ އާއި ކޮންމެ އަހަރެއްގެވެސް ރޯދަމަހު ލޭ ލިބުން ދަތިވާތީ އެކަމަށް އެހީތެރިވުމުގެ ގޮތުން ކަމަށް އެމްއޭސީއެލް އިން ބުނެއެވެ.
މިކަމާ ގުޅިގެން އެމްއޭސީއެލްގެ ޕަބްލިކް ރިލޭޝަންސް އެގްޒެކެޓިވް، ރިޝްފާ ވިދާޅުވީ، އެމްއޭސީއެލްގެ ބްލަޑް ޑޮނޭޝަން ކޭމްޕްގައި ބައިވެރިވުމަށް އެދި ސްޓޭކް ހޯލަޑަރުންނަށް ދަޢުވަތު އަރުވާފައިވާނެ ކަމަށެވެ.
”ވަރަށް ގިނަ ބޭފުޅުން ހަމަ ޕޮޒިޓިވް ރެސްޕޯންސެސް ދެއްވާ ހަމަ އެ ބޭފުޅުންގެ މުވައްޒަފުން އަޅުގަނޑުމެންގެ މި ބްލަޑް ޑޮނޭޝަން ކޭމްޕްގައި ބައިވެރިކުރެއްވިކަން ހަމަ ފާހަގަކޮށްލަންޖެހޭ، އަޅުގަނޑުމެންގެ އިލްތިމާސްއަކީ ކޮންމެ ފަރުދަކީވެސް ގަވާއިދުން ބްލަޑް ޑޮނޭޓް ކުރައްވާ ބޭފުޅަކަށް ވަމާ ހިނގާށޭ،“ — ރިޝްފާ ވިދާޅުވިއެވެ.
މި ދުވަސްވަރު ލޭ ލިބުން ދަތިވެފައިވާތީ ވީހާ ވެސް ގިނަ ފަރާތްތަކުން ލޭ ހަދިޔާކޮށްދިނުމަށް މޯލްޑިވްސް ބްލަޑް ސާވިސް (އެމްބީއެސް)އިން އެދިފައިވަނީ މިދިޔަ މަހުގެ 22 ވަނަ ދުވަހުއެވެ. އެމްބީއެސް އިން ބުނީ، ލޭ ހޯދުމަށް އެދިފައިވަނީ ޑޯނަރުން ނުލިބިގެން ކުދިން އުޅޭތީ ކަމަށާއި، ހުރިހާ ވައްތަރެއްގެ ލޭ ވެސް ބޭނުންވާ ކަމަށެވެ.
އެމްބީއެސްއިން ބޭނުންވާ ލޭގެ ވައްތަރުތައް:
- އޭ ޕޮޒިޓިވް
- އޯ ޕޮޒިޓިވް
- އޯ ނެގެޓިވް
- ބީ ޕޮޒިޓިވް
- ބީ ނެގެޓިވް
- އޭބީ ޕޮޒިޓިވް
ކޮންމެ ހަފްތާއެއްގެ ވެސް އާދިއްތަ ދުވަހުން ބުރާސްފަތި ދުވަހުގެ ނިޔަލަށް ހެނދުނު 08:00 އިން ރޭގަނޑު 20:00 އާ ހަމައަށް ލޭ ހަދިޔާ ކުރެވޭނެ އެވެ. ލޭ ހަދިޔާ ކުރަން ބޭނުންވާ ފަރާތްތަކުން ހުޅުމާލޭގައި ހުންނަ އޮރެންޖް ހިޔާއަށް އެ ވަގުތުތަކުގައި ދިއުމުން ލޭ ހަދިޔާ ކުރެވޭނެ އެވެ. ނަމަވެސް ލޭ ހަދިޔާ ކުރެވޭނީ އުމުރުން 18 އަހަރު ވެފައިވާ މީހުންގެ ތެރެއިން 45 ކިލޯއަށް ވުރެ ބަރު މީހުންނަށެވެ.
ލޭ ހަދިޔާކުރަން ދާއިރު މަދުވެގެން ހަ ގަޑިއިރުގެ ނިދި ހަމަކުރުމަށާއި އަދި ލޭ ހަދިޔާކުރަން ދިއުމުގެ އެއްގަޑިއިރު ކުރިން ކެއުމަށް ބްލަޑް ސާވިސްއިން ވަނީ އެދިފައެވެ.
