”ބިންވެރިޔާ“ ސްކީމްގެ ދަށުން ގިރާވަރުފަޅުން ގޯތި ލިބިފައިވާ މީހުންނަށް އެ ފަޅުގެ އާ ލޭންޑް ޔޫސް ޕްލޭނާ އެއްގޮތަށް ޕްލޮޓްތައް ކަނޑައެޅުމަށް ބާއްވާ ގުރުއަތުލުން މިއަދު ފަށައިފިއެވެ.
މި ބަދަލާއެކު ކުރިން ކަނޑައަޅާފައިވާ ގޯތިތަކުގެ ސަރަޙައްދުތަކަށް ބަދަލު އައިސްފައިވާތީ، ކޮންމެ ގޯއްޗަކަށް ވެސް މިހާރު ވަނީ އާ ލޮޓް ނަންބަރުތަކެއް ކަނޑައަޅާފައެވެ. މިއަދު ކުރިއަށްދާ ގުރުއަތުލުމަކީ މި ބަދަލާ ގުޅިގެން ގޯތި ލިބިފައިވާ ފަރާތްތަކަށް އާ ޕްލޮޓްތައް ޙަވާލުކުރުމަށްޓަކައި ކުރިއަށްގެންދާ މަސައްކަތެކެވެ.
ގިރާވަރުފަޅުން ދޫކޮށްފައިވާ ގޯތިތަކުގެ ތަފްސީލަށް ބަލާއިރު:
1250 އަކަފޫޓުގެ 2605 ގޯތި
1650 އަކަފޫޓުގެ 1213 ގޯތި
2050 އަކަފޫޓުގެ 253 ގޯތި
2450 އަކަފޫޓުގެ 1 ގޯތި
ގުރުއަތުލުމުގެ ކަންކަން ކުރިއަށް ގެންދަނީ ހައުސިން މިނިސްޓްރީން މުވައްޒަފުންނެވެ. ގުރުއަތުލާ ހޯލަށް ކޮންމެ ޕްލޮޓަކުން އެކަކަށް ވަދެވޭނެ އިންތިޒާމު ހަމަޖައްސާފައިވާއިރު، ގުރުއަތުން ލިބޭ ޕްލޮޓް ނަންބަރު އެ ފަރާތަކަށް ވަގުތުން އެސްއެމްއެސް މެދުވެރިކޮށް ލިބިގެންދާނެއެވެ. މިއީ ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުތަކެއް ގެނެސް، އާ ޕްލޭނެއް އެކުލަވާލުމާ ގުޅިގެން ނަގާ ގުރުއަތުލުމެކެވެ. އާ ލޭންޑް ޔޫސް ގޯތިތަކުގެ ގުރުއަތުލުން ނިމުމުން، ގޯތިތަކުގެ ރަޖިސްޓްރީއާއި ބިން ލިބޭ ފަރާތްތަކާއެކު ވެވޭ އެއްބަސްވުންތަކާ ގުޅޭ މަޢުލޫމާތު ފަހުގެ ތާރީހެއްގައި މިނިސްޓްރީން ހާމަކުރާނެއެވެ. އަދި ގިރާވަރުފަޅުގެ ބިން ހިއްކާ ނިމުމާއެކު، ގޯތި ލިބިފައިވާ ފަރާތްތަކާ ބިން ޙަވާލުކުރުމުގެ އަމަލީ މަސައްކަތް ފެށިގެންދާނެ ކަމަށް ވެސް އެ މިނިސްޓްރީން ބުންޏެވެ.
ނިމިދިޔަ އެމްޑީޕީ ސަރުކާރުން ކަނޑުފަޅުން ދިން ގޯތިތައް ހިއްކަން ފެށިފައިވާއިރު، ރައީސް ޑރ. މުޢިއްޒު ވެރިކަމަށް ވަޑައިގެންނެވިއިރު، ގިރާވަރުފަޅުގެ ބޮޑު ބައެއް ހިއްކާ ނުނިމެއެވެ. ރައީސް ޑރ. މުޙައްމަދު މުޢިއްޒުގެ ސަރުކާރުން އަންނަނީ ރައްޔިތުންނަށް ލިބިފައިވާ ގޯތިތައް ވީހާވެސް އަވަހަށް ހަވާލުކޮށް، ބޯހިޔާވަހިކަމުގެ މަޝްރޫޢުތައް ހަލުވިކަމާއެކު ކުރިއަށް ގެންދިއުމަށް ގިނަ މަސައްކަތްތަކެއް ކުރަމުންނެވެ.
ގިރާވަރުފަޅުން 167.15 ހެކްޓަރު ހިއްކުމަށް ހަމަޖެހިފައިވާ އިރު، މިހާރު ވެސް ނުހިއްކާ 97.15 ހެކްޓަރު އެބައޮތެވެ. ގިރާވަރުފަޅު ހިއްކުމުގެ މަސައްކަތް އިއްޔެ ފެށިއިރު، އެ މަސައްކަތް ކުރަނީ 22،000 ސީބީއެމްގެ ”އޮރެންޖު“ ނަމަކަށް ކިޔާ ޑްރެޖަރަކުންނެވެ.ޕްލޭންގައި ވާ ގޮތުން މިހާރު ދޫކުރުމަށް ނިންމާފައިވަނީ ޖުމްލަ 4،072 ގޯއްޗެވެ.
