އައްޑޫ ސިޓީ ގަން އިންޓަނޭޝަނަލް އެއާޕޯޓަކީ ބައިނަލްއަޤުވާމީ އެއާލައިންތައް ސީދާ ދަތުރުކުރާ ރާއްޖޭގެ ދެކުނުގެ ވައިގެ މައި ހަބު ނުވަތަ ”ސަދަން ހަބް“ ކަމުގައި މި ސަރުކާރުން ހަދާނެ ކަމަށް މިނިސްޓަރު އޮފް ޓްރާންސްޕޯޓް އެންޑް ސިވިލް އެވިއޭޝަން މުހައްމަދު އަމީން ވިދާޅުވެއްޖެއެވެ.
މިނިސްޓަރު އަމީން މިހެން ވިދާޅުވީ ފުވައްމުލައް ސިޓީގައި ބޭއްވި ”ސަދަން ކަނެކްޓިވިޓީ“ އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ފާހަގަކުރެއްވި ގޮތުގައި، ގަން އިންޓަނޭޝަނަލް އެއާޕޯޓަކީ މީގެ 15 އަހަރު ކުރިއަށް ބެލިކަމުގައި ވިޔަސް، ދުނިޔޭގެ ކޮމާޝަލް އެއާލައިންތަކުގައި ބޭނުންކުރާ ހުރިހާ ސައިޒެއްގެ މަތިންދާބޯޓު އޮޕަރޭޓް ކުރެވޭނެ ގާބިލުކަން ހުރި އެއާޕޯޓެކެވެ.
ނަމަވެސް، އެފަދަ މާހައުލެއް މިހާތަނަށް ގާއިމުވެފައި ނެތީ އެކަށީގެންވާ މިންވަރަށް އެއާލައިންތައް އޮޕަރޭޓް ކުރުމަށް ގަދައަޅައި ކުރަންޖެހޭ މަސައްކަތްތައް ކުރެވިފައި ނެތުމުންނާއި، ފަތުރުވެރިކަމާ ގުޅުންހުރި ކަންކަން އެންމެ އެދެވޭ ގޮތެއްގައި ހަމަޖެހިފައި ނެތުމުން ކަމަށް މިނިސްޓަރު ވިދާޅުވިއެވެ.
ހަމައެހެންމެ، މިއީ ރައީސްގެ ސިޔާސަތާއި އެއްގޮތަށް، މި ސަރަޙައްދުގެ ދަތުރުފަތުރުގެ ނިޒާމު ހަރުދަނާކޮށް އިޤްތިޞާދީ އާދިރުމެއް ގެނައުމަށް އެޅުނު މުހިންމު ފިޔަވަޅެއް ކަމަށާއި، 1 ފެބްރުއަރީ 2026 ގައި މި ފެށޭ ޚިދުމަތާއެކު، އައްޑޫ، ފުވައްމުލައް އަދި ހުވަދު އަތޮޅުގެ ޓޫރިޒަމާއި އާންމު ދަތުރުފަތުރަށް ބޮޑު ލުޔެއް ލިބިގެންދާނެ ކަމަށް މިނިސްޓަރ އަމީން އެކްސްގައި ކުރެއްވި ޕޯސްޓުގައި ވިދާޅުވިއެވެ.
ދެކުނުގެ ހަތަރު އަތޮޅު ވައިގެ މަގުން ގުޅާލުމަށް ރައީސުލްޖުމްހޫރިއްޔާ @MMuizzu ވެވަޑައިގެންނެވި ވަޢުދުފުޅާއި އެއްގޮތަށް "ސަދަން ކަނެކްޓިވިޓީ" މިއަދު މިވަނީ އިފްތިތާޙް ކުރެވިފައި. މިއީ، ދެކުނުގެ ހަތަރު އަތޮޅުގެ ރައްޔިތުންގެ ދިރިއުޅުމަށް އުފާވެރިކަން ގެނުވާނެ މުހިންމު ފެށުމެއް.… pic.twitter.com/tGq0adItAu
— Mohamed Ameen (@ameen3d) January 30, 2026
ރަސްމިއްޔާތުގައި މިނިސްޓަރު އިތުރަށް ވިދާޅުވީ، އަލަށް އިފްތިތާހު ކުރެވުނު އެއާ ކަނެކްޓިވިޓީގެ ވަސީލަތްތަކާއެކު ފުވައްމުލައް، ހުވަދު އަތޮޅު އަދި އައްޑޫ އަތޮޅު ހިމެނޭހެން މުޅި ސަރަހައްދުގެ ފަތުރުވެރިކަމުގެ ދާއިރާ ފުޅާވެގެންދާނެ ކަމަށެވެ. އަދި ގަން އެއާޕޯޓަށް ބައިނަލްއަގުވާމީ ދަތުރުތައް އިތުރުކުރުމަށްޓަކައި މެދުއިރުމަތީގެ އެއާލައިނަކާއި ޗައިނާގެ އެއާލައިނެއް ގެނައުމަށް ސަރުކާރުން މިހާރުވެސް މަސައްކަތް ކުރަމުންދާކަން އޭނާ ހާމަކުރެއްވިއެވެ.
”ބޮޑެތި ކޮންސެޝަންތަކެއް ދީގެން ނަމަވެސް އެއާލައިންތައް ގަން އިންޓަނޭޝަނަލް އެއާޕޯޓަށް ގެންނަން އެބަޖެހޭ،“ މިނިސްޓަރު ވިދާޅުވިއެވެ.
މިނިސްޓަރު އަމީންގެ ވާހަކަފުޅު ނިންމަވާލެއްވީ، ގަން އިންޓަނޭޝަނަލް އެއާޕޯޓުގެ މިހާރުގެ ހާލަތު ބަދަލުކޮށް، އެތަނަކީ އެއާލައިންތައް އަންނަ ރާއްޖޭގެ ވައިގެ ”ސަދަން ހަބް“ ކަމުގައި މި ސަރުކާރުން ކަށަވަރުކޮށްދޭނެ ކަމުގެ ޔަޤީންކަން ދެއްވަމުންނެވެ.
