ކުދި މަތިންދާބޯޓު ޖެއްސޭ ގޮތް ހަދައި، ރާއްޖޭގެ އެންމެ ދެކުނުގެ ހަތަރު އަތޮޅު ވައިގެ މަގުން ގުޅާލައިފިއެވެ.
ރާއްޖޭގެ އެންމެ ދެކުނުން އައްޑޫ އަތޮޅާއި، ފުވައްމުލަކާއި، ގއ.އަތޮޅު އަދި ގދ. އަތޮޅު ވައިގެ މަގުން ގުޅާލާ ރަސްމީކޮށް ދަތުރުތައް ފަށާނީ އަންނަ އާދިއްތަ ދުވަހުއެވެ.
މިކަމަށްޓަކައި އައްޑޫ ސިޓީ އިންޓަރނޭޝަނަލް އެއަރޕޯޓުގައި ބޭއްވި ރަސްމިއްުތުގައި މިޚިދުމަތް ފައްޓަވާ ދެއްވީ ޓްރަންސްޕޯޓް މިނިސްޓަރު މުހައްމަދު އަމީންއެވެ. މި ރަސްމިއްޔާތުގައި ހޯމް މިނިސްޓަރު އަލީ އިހްސާންވެސް ބައިވެރިވެޑައިގަތެވެ.
މި ރަސްމިއްޔާތުގައި މި ދަތުރުތައް ފެށުމުގެ ހުއްދަ މޯލްޑިވިއަންއާ ހަވާލުކޮށްދެއްވީ ޓްރާންސްޕޯޓު މިނިސްޓަރު އަމީނެވެ. މޯލްޑިވިއަންގެ ފަރާތުން އެ ހުއްދައާ ހަވާލުވެވަޑައިގެންނެވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސްއެވެ.
ދެކުނުގެ ހަތަރު އަތޮޅުތަކަށް ދަތުރުކުރާ އަގުތަކަކީ:
ގަން – ފުވައްމުލަކު: ކޮޅަކަށް 500 ރުފިޔާ
ގަން – ކާޑެއްދޫ: ކޮޅަކަށް 900 ރުފިޔާ
ގަން – ކޫއްޑޫ: ކޮޅަކަށް 900 ރުފިޔާ
ފުވައްމުލަކު – ކާޑެއްދޫ: ކޮޅަކަށް 650 ރުފިޔާ
ފުވައްމުލަކު – ކޫއްޑޫ: ކޮޅަކަށް 650 ރުފިޔާ
މޯލްޑިވިއަންއިން ވަނީ މިހާރު އެ ދަތުރުތަކުގެ ބުކިންއަށް ހުޅުވާލާފައެވެ.
މި ޚިދުމަތަށް ބޭނުންކުރާނީ ޑީއެޗްސީ-6-300 ޓްވިން އޮޓާ ބޯޓެވެ. މި ބޯޓުތަކުގައި ގާތްގަނޑަކަށް 15 ވަރަކަށް މީހުންނަށް ދަތުރުކުރެވޭނެއެވެ.
މި ދަތުރުތައް ކުރުމަށް ހަމަޖެހިފައިވަނީ މޯލްޑިވިއަންގެ ކުދި ބޯޓުތައް، އެއްގަމު ރަންވޭތަކަށް ޖެއްސޭހެން ހެދުމަށް ފަހެވެ.
