ފިނޭންސް މިނިސްޓަރު މޫސާ ޒަމީރު އޮމާނަށް ކުރައްވަމުން ގެންދަވާ ރަސްމީ ދަތުރުފުޅުގައި، އެ ޤައުމުގެ ފިނޭންސް މިނިސްޓަރު ސުލްޠާން ބިން ސާލިމް ބިން ސަޢީދު އަލް ހަބްސީއާ މިއަދު ބައްދަލުކުރައްވައިފިއެވެ.
ފިނޭންސް މިނިސްޓްރީން އެކްސްގައި ހިއްސާކުރި ޕޯސްޓެއްގައި ބުނީ މި ބައްދަލުކުރެއްވުމުގައި، ދެ ޤައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ވަރުގަދަކޮށް، އިޤްތިޞާދީ އެއްބާރުލުން ފުޅާކުރެވިދާނެ ގޮތްތަކާ ގުޅޭގޮތުން ދެ ބޭފުޅުން މަޝްވަރާ ކުރެއްވި ކަމަށެވެ.
Minister @MoosaZameer met with H.E. Sultan Salim Said Al Habsi, Minister of Finance of the Sultanate of Oman today. The meeting focused on strengthening trade, maritime and fisheries cooperation, collaborating on energy projects in the Maldives, and broader economic partnership… pic.twitter.com/5kAoX5M5Ww
— Ministry of Finance and Planning (@MoFmv) January 29, 2026
ދެ ބޭފުޅުން ވަނީ، ވިޔަފާރީގެ މުޢާމަލާތްތައް އިތުރުކުރުމާއި، ކަނޑުގެ ވަޞީލަތްތަކާއި މަސްވެރިކަމުގެ ސިނާޢަތުގައި ހުރި ފުރުޞަތުތަކުގެ ބޭނުން އެންމެ އެދެވޭ ގޮތުގައި ހިފުމާ ގުޅޭގޮތުން މަޝްވަރާ ކުރައްވައިފައެވެ. މީގެ ތެރޭގައި ކަނޑުދަތުރުފަތުރުގެ ޚިދުމަތްތަކާއި، ވެލިއު ޗެއިން އަދި އެއާ ގުޅުންހުރި ވިޔަފާރީގެ ހަރަކާތްތަކުން ލިބެންހުރި ފުރުޞަތުތައް ހިމެނެއެވެ. އަދި ހަމައެހެންމެ ރާއްޖޭގައި ކުރިއަށްގެންދާ ހަކަތައާ ގުޅޭ މަޝްރޫޢުތަކުގައި ދެ ފަރާތް ގުޅިގެން މަސައްކަތް ކުރެވިދާނެ ދާއިރާތަކާ ބެހޭގޮތުން އަދި، ރާއްޖޭގެ ތަރައްޤީގެ އަމާޒުތަކަށް އެހީތެރިކަން ފޯރުކޮށްދިނުމާ ގުޅޭގޮތުން ވެސް މި ބައްދަލުވުމުގައި ދެ ބޭފުޅުން މަޝްވަރާ ކުރެއްވިއެވެ.
އޮމާނަކީ ރާއްޖެއަށް އެންމެ ގިނައިން ތެޔޮ އެތެރެކުރާ ޤައުމު ކަމަށްވުމުން، މި ޒަމާންވީ އިޤްތިޞާދީ ގުޅުން ދެމެހެއްޓުމާއި އިތުރަށް ތަރައްޤީކުރުމުގެ މުހިންމު ކަމަށް މި ބައްދަލުވުމުގައި އަލިއަޅުވާލައްވާފައިވެއެވެ.
