ދިވެހިރާއްޖޭގެ ތަރައްޤީއާއި ހެވަށް މަސައްކަތް ކުރެވޭނީ ކުރިއަށްއޮތް ލޯކަލްކައުންސިލްތަކުގެ އިންތިޚާބުގައި އިދިކޮޅު މައި ޕާޓީ އެމްޑީޕީގެ ފަރާތުން ވާދަކުރައްވާ ކެންޑިޑޭޓުންނަށް ވޯޓުދީގެން ކަމަށް އެޕާޓީގެ ކައުންސިލް އިންތިޚާބުގެ ތަރުޖަމާނު ޢަބްދުﷲ ވަހީދު ވިދާޅުވެއްޖެއެވެ.
ޢަބްދުﷲ ވަހީދު މިފަދައިން ވިދާޅުވީ ކައުންސިލް އިންތިޚާބާއި ގުޅޭގޮތުން އެމްޑީޕީން ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. އިންތިޚާބަށް އެމްޑީޕީން ވަމުންދާ ތައްޔާރީތައް ހިއްސާކުރައްވާ އޭނާ ވިދާޅުވީ އެމްޑީޕީއިން ދަނީ މި އިންތިޚާބަށް ވާން ޖެހޭ ތައްޔާރީތައް ވަމުން ކަމަށެވެ. އެގޮތުން ކެންޑިޑޭޓުންގެ ފޯމުތައް ހުށަހެޅުމާއި، ކެމްޕޭން ޓީމުތައް އެކުލަވާލުމާއި، ކެންޕެއިން މެނިފެސްޓޯއެއް އެކުލަވާލައި، މުޅި ރާއްޖޭގައި ކެންޑިޑޭޓުންނަށް ޓްރެއިން ދިނުމުގެ މަސައްކަތް ކުރަމުންދާ ކަމަށް ވިދާޅުވިއެވެ.
މީގެ އިތުރުން ސަރުކާރުން އިދިކޮޅު ކެންޑިޑޭޓުންނަށް ހުރަސް އަޅާކަމަށާއި، އިންތިޚާބަށް ނުފޫޒު ފޯރުވާ ކަމަށް އެމްޑީޕީން ވަނީ ތުހުމަތު ކުރައްވާފައެވެ.
”ސަރުކާރުން ދަނީ އެތައް ނުފޫޒެއް ފޯރުވަމުން، ގޯއްޗާއި ފުލެޓު ބަހަނީ، އެތައް ވަޒީފާއެއް ދަނީ ދެމުން، އޭސީސީން ދަނީ ސަރުކާރުން ކުރާ ކަންކަމަށް ތަރުހީބު ދެމުން“ ތަރުޖަމާނު ވަހީދު ވިދާޅުވިއެވެ.
މީގެ އިތުރުން އެމްޑީޕީން އެދެނީ އެ ޕާޓީގެ އެމްޑީޕީގެ ކެންޑިޑޭޓުން ހޮވުމަށް ކަމަށާއި ރަށްރަށުގެ ތަރައްޤީއަށް އަދި ހެވަށް ވެސް މަސައްކަތް ކުރެވޭނީ އޭރުން ކަމަށް ވަހީދު ވިދާޅުވިއެވެ. އޭނާ ވިދާޅުވީ ރަށްރަށުގައި މަސައްކަތް ހުރީ ހުއްޓިފައި ކަމަށާއި، އެހެން އެކަން ހުރި އިރު ވެސް ޕީއެންސީގެ ކައުންސިލަރުން ރައްޔިތުންގެ ހައްގުގައި ބަސް ބުނާ ތަން ނުފެންނަ ކަމަށެވެ. އެހެން ނަމަވެސް ހުއްޓިފައި ހުރީ ކޮންރަށެއްގެ ކޮން މަސައްކަތެއް ކަމެއް ތަފްސީލެއް ނުކޮށްދެއްވައެވެ.
”އަޅުގަނޑުމެން އެދެނީ އެމްޑީޕީގެ ކެންޑިޑޭޓުން ހޮވުން. ރަށްރަށުގެ ތަރައްގީއަށް އަދި ހެވަށް ވެސް މަސައްކަތް ކުރެވޭނީ އޭރުން. ރަށްރަށުގައި މަސައްކަތް ހުއްޓިފައި ހުރި އިރު ވެސް ޕީއެންސީގެ ކައުންސިލަރުން ރައްޔިތުންގެ ހައްގުގައި ބަސް ބުނާ ތަނެއް ނުފެނޭ“ ވަހީދު ވިދާޅުވިއެވެ.
ވަހީދު ވިދާޅުވީ އެމްޑީޕީއަކީ އިންތިޚާބުތަކަށް ފަރިތަ އިންތިޒާމު ވެގެން މަސައްކަތް ކުރާ ޕާޓީއެއް ކަމަށާއި، އެމްޑީޕީ މި ނުކުންނަނީ ކައުންސިލުތައް ސިޔާސީ ނުފޫޒުން ސަލާމަތް ކުރަން ކަމަށެވެ. އަދި އެމްޑީޕީން އޮތީ ލާމަރުކަޒީ ނިޒާމު ހިންގަން ތައްޔާރުވެފައި ކަމަށާއި، އެޕާޓީގެ ކައުންސިލަރުން ހޮވައި ދިނުމަށް އެދެނީ ބާރުވެރި ކައުންސިލްތަކަކަށް މަގު ފަހިކޮށް ދިނުމަށް ކަމަށް ވަހީދު ވިދާޅުވިއެވެ.
