ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަންފީ މިއަދުން ފެށިގެން ދެ އަހަރުގެ މުއްދަތަކަށް %50 އަށް ކުޑަކޮށްފިއެވެ.
މޯލްޑިވްސް ފުޑް އެންޑް ޑްރަގް އަޮތޯރިޓީން ވިދާޅުވީ ކާބޯތަކެތީގެ ޚިދުމަތްދޭ ތަންތަން ރަޖިސްޓްރީކުރުމުގައި އެ އިދާރާއިން ނަގަަމުން އަންނަ ރަޖިސްޓްރޭޝަން ފީއާއި ކެޓަގަރީ ފީ ކުޑަކުރަން ނިންމާފައިވާ ކަމަށެވެ. އެގޮތުން، މިއަހަރުން ފެށިގެން ދެ އަހަރު ދުވަހުގެ މުއްދަތަކަށް ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ އާއި ކެޓަގަރީ ފީ%50 ކުޑަކުރަން ނިންމާފައިވާކަމަށް އެ އޮތޯރިޓީން ވިދާޅުވިއެވެ.
ކާބޯތަކެތީގެ ޚިދުމަތް ދޭ ތަންތަނަށް ފަރާތްތައް ރަޖިސްޓްރީކޮށް ލައިސަންސް ދޫކުރުމުގައި ޢަމަލު ކުރާނެ ގޮތުގެ އިންތިޤާލީ އުޞޫލުގެ ޤަވައިދުގައި ވާގޮތުން
ކާބޯތަކެތީގެ ހިދުމަތްދޭ ތަންތަން 14 ކެޓަގަރީއަކަށް ވަނީ ބަހާލާފައެވެ. ހުރިހާ ތަނަކަށް ވެސް ރަޖިސްޓްރޭޝަން ފީގެ ގޮތުގައި ނެގުމަށް އުޞޫލްގައި ކަނޑައަޅާފައި އޭރު އޮތީ 500 ރުފިޔާއެވެ. މިއީ އެއް ފަހަރު ނަގާ ފީއެއް ކަމަށް ގަވައިދުގައިވެއެވެ. ނަމަވެސް އެމްއެފްޑީއޭއިން ގެނައި ބަދަލާއެކު ދެން ރަޖިސްޓްރޭޝަން ފީގެ ގޮތުގައި ނަގާނީ 250 ރުފިޔާއެވެ. މީގެ އިތުރުން، އަހަރީ ފީގެ ގޮތުގައި 2،000ރުފިޔާއިންއިން ފެށިގެން އެކި އަގުތައް އެކި ކެޓަގަރީތަކުގެ ތަންތަނުން ނަގައެވެ. މިއަދުން ފެށިގެން ދެން ދައްކަންޖެހޭނީ މި އަގުތަކުގެ ދެބައިކުޅަ އެއްބައެވެ.
މިހާރު ނަގާ އަގުތަކަކީ:
– ހޮޓާ، ކެފޭ، ރެސްޓޯރެންޓު، ކެންޓީނު ފަދަ އިކޮނޮމިކް މިނިސްޓްރީގައި ރަޖިސްޓްރީކޮށްގެން ހިންގާ ތަންތަނުން 2،000 ރުފިޔާ، އިތުރުވާ ކޮންމެ ބަދިގެ، ސާވިން އޭރިއާއަކަށް 100 ރުފިޔާ. އަދި އިތުރުވާ ކޮންމެ 50 ގޮނޑިއަކަށް ވެސް 100 ރުފިޔާ
– ކޭޓަރިން، ބޭކަރީ އަދި ޕޭސްޓްރީ ޝޮޕްތަކުން 1000 ރުފިޔާ
– ބަތްޕާރުސަލް ހަދައި ވިއްކާ ޓޭކްއަވޭ ތަންތަނުން 2000 ރުފިޔާ
– ވިޔަފާރި އުސޫލުން ކާބޯތަކެތި ތައްޔާރުކޮށް ފޯރުކޮށްދޭ ބަދިގެތަކުން 2،000ރުފިޔާ
– ހެދިކާ ވިއްކާ ތަންތަނުން 2،000ރުފިޔާ
– ޖޫސް ފަދަ ބުއިންތައް އެކަނި ވިއްކާ ތަންތަނުން 2،000ރުފިޔާ
– މަގުމަތީގައި ކާނާ ވިއްކާ ތަންތަނާއި ގާޑިޔާ އަދި އެހެން އުޅަނދުތަކުން 500ރުފިޔާ
ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ %50 ކުޑަކުރުމަށް ނިންމާފައިވާިއރު 2024 ވަނަ އަހަރުގެ އޯގަސްޓްމަހުގެ 23 ވަނަ ދުވަހު ވަނީ ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން މޯލްޑިވް ފުޑް އެންޑް ޑްރަގް އޮތޯރިޓީއަށް ޤާނޫނީ ޙައިސިއްޔަތު ލިބިފައިވާތީ ރައީސުލްޖުމްހޫރިއްޔާ ވަނީ އެ އޮތޯރިޓީ އަލުން އެކުލަވާލައްވާފައެވެ. ފުޑް އެންޑް ޑްރަގް އޮތޯރިޓީއަށް މި ޤާނުނުގެ ތެރެއިން މަތިކުރާ އެންމެ ބޮޑު އެއް ޒިންމާއަކީ ކާބޯތަކެތީގެ ޚިދުމަތް ދޭ ތަންތަން ދަރަޖަކުރުމާއި ލައިސަންސްދީ ހުއްދަ ދޫކުރުމުގެ މަސައްކަތަކެވެ. މި ބަދަލާއެކު ކާބޯތަކެތީގެ ޚިދުމަތްދޭ ކެފޭ، ހޮޓާ، ރެސްޓޯރަންޓްތައް ރެޖިސްޓްރީކުރުމާއި ހުއްދަ ދިނުމުގެ ކަންކަން ދެން ބަލަހައްޓާނީ މޯލްޑިވްސް ފުޑް އެންޑް ޑްރަގް އޮތޯރިޓީންނެވެ.
