މި އަހަރުގެ ރޯދަ ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދެއްވަން ނިންމަވާފައިވާ މަސްދަޅު ކޭހުގެ ތެރެއިން، މިހާތަނަށް 15,997 މަސްދަޅު ކޭސް ދޫކޮށްފައިވާ ކަމަށް ސިޓީސް މިނިސްޓްރީން ހާމަކޮށްފިއެވެ.
އެ މިނިސްޓްރީން ބުނީ، މާލެ ސަރަޙައްދުގައި 65،230 ޑޮމެސްޓިކް ކަރަންޓް މީޓަރު ރަޖިސްޓްރީކޮށްފައިވާތީ ރޯދަ ހަދިޔާގެ ގޮތުގައި ބަހާ މަސްދަޅު ކޭސް ދޫކުރަނީ މި ޢަދަދަށް ކަމަށެވެ. އެއީ، ކޮންމެ ކަރަންޓު މީޓަރަކަށް އެއް މަސްދަޅު ކޭހުގެ ރޭޓުންނެވެ.
މާލެ ސަރަޙައްދުގައި ރަޖިސްޓްރީކޮށްފައިވާ ޑޮމެސްޓިކް ކަރަންޓް މީޓަރުތަކުގެ ތެރެއިން މިހާތަނަށް 15,997 ގޭބިސީއަށް މަސްދަޅު ކޭސް ދޫކޮށްފައިވާ ކަމަށް އެ މިނިސްޓްރީން ވަނީ ބުނެފައެވެ. އެއީ، މާލެ ސަރަޙައްދުގައި ބަހަންޖެހޭ މަސްދަޅު ކޭހުގެ ޖުމްލަ %18.8 އެވެ.
މާލެ ސަރަޙައްދުގައި މަސްދަޅު ކޭސް ދޫކުރަން ފަށާފައިވަނީ، މި މަހުގެ 24 ވަނަ ދުވަހުގެ ރެއިން ފެށިގެންނެވެ. އަތޮޅުތެރޭގެ ރަށްތަކުގައި މަސްދަޅު ކޭސް ދޫކުރުމުގެ އެންމެ ފަހުގެ ތައްޔާރީތައް އަންނަނީ ވަމުންނެވެ. މި މަސައްކަތުގައި އެންމެ އިސްކޮށް އުޅެނީ އެސްޓީއޯއިންނެވެ.
މާލޭ ސަރަޙައްދުގައި މަސްދަޅު ކޭސް ދޫކުރުމަށް 15 މަރުކަޒެއް ވަނީ ކަނޑައަޅައިފައެވެ. އެ ތަންތަނުން މަސްދަޅު ކޭސް ދޫކުރާނީ، ޕޯޓަލް މެދުވެރިކޮށް ޓޯކަން ނެގުމުންނެވެ.
މާލޭގައި މަސްދަޅު ކޭސް ދޫކުރާ މަރުކަޒުތައް:
މިފްކޯ މަރުކަޒު
ސޯޝަލް ސެންޓަރު
އެމްޓީސީސީ ސޯމިލު
ހެންވޭރު ބޯޅަދަނޑު
ގަލޮޅު ދަނޑު
ހުޅުމާލެ ފުރުތަމަ ފިޔަވަހީގައި މަސްދަޅު ކޭސް ދޫކުރާ މަރުކަޒުތައް:
ޢުމަރު ޒާހިރު ބިލްޑިންގ
ޕޮލްކޯ ޓަވަރ
މުޙައްމަދު ޤާސިމް ޕްރީ ސްކޫލް
ހުޅުމާލެ ދެވަނަ ފިޔަވަހީގައި މަސްދަޅު ކޭސް ދޫކުރާ މަރުކަޒުތައް:
ކާމިލް ދީދީ ސްކޫލް
ހިޔާ ޓަވަރު 10
އެމްޕީއެލް ޓަވަރު ޕީ
ވިލިމާލޭގައި މަސްދަޅު ކޭސް ދޫކުރާނީ ހަމައެކަނި ވިލިމާލޭ ވެމްކޯ ސައިޓްންނެވެ. މީގެ އިތުރުން އަތޮޅުތެރޭގެ ރަށްތަކުގައި މަސްދަޅު ކޭސް ދޫކުރުމުގެ މަސައްކަތް ކުރިއަށް ގެންދާނީ، އެ ރަށެއްގެ ކައުންސިލުގެ ބެލުމުގެ ދަށުންނެވެ.
ރޯދަ ހަދިޔާގެ ގޮތުގައި މި ފަހަރު ޖުމްލަ 118،673 ގޭބިސީއަށް މަސްދަޅު ކޭސް ދޫކުރުމަށް ވަނީ ނިންމާފައެވެ.
