މާލެ، ދިވެހިރާއްޖެ – އިންޑިއާގެ ވެސްޓް ބެންގޯލް ސަރަހައްދުގައި ނިޕާ ވައިރަސް ފެތުރެމުންދާތީ، އެ ސަރަހައްދަށް ދަތުރުކުރާ ދިވެހިން ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އިލްތިމާސްކޮށްފިއެވެ.
އެޗްޕީއޭއިން މިކަމަށް އިލްތިމާސްކުރީ، މި ހިނގާ ޖެނުއަރީ މަހުގެ ތެރޭގައި ވެސްޓް ބެންގޯލްއިން ނިޕާ ވައިރަސްގެ ތިން ކޭހެއް ފެނުމާ ގުޅިގެން ނެރުނު ބަޔާނެއްގައެވެ. އެ އެޖެންސީން ހާމަކުރި ގޮތުގައި، މި ބަލި ފެނުނު މީހުންނާ ގުޅިގެން 180 އަށްވުރެ ގިނަ މީހުން ކޮންޓެކްޓުންގެ ގޮތުގައި މިހާރު ވަނީ ކަރަންޓީނުކޮށްފައެވެ.
މި ބައްޔާ ގުޅޭގޮތުން އެޗްޕީއޭއިން ބުނީ، މިއީ ޓެރޯޕަސް އާއިލާގެ ވާލުންނާއި އޫރުގެ ފަރާތުން އިންސާނުންނަށް ފެތުރޭ ބައްޔެއް ކަމަށެވެ. އަދި މިހާތަނަށް އިންޑިއާގެ އެހެން އެއްވެސް ސަރަހައްދަކުން ނުވަތަ އެހެން ގައުމަކުންވެސް މި ބަލި ފެނިފައިވާ ކަމުގެ ރިޕޯޓެއް ލިބިފައިނުވާ ކަމަށް އެޗްޕީއޭއިން ބުނެއެވެ.
ރާއްޖޭގެ ހާލަތާ ގުޅޭގޮތުން އެޗްޕީއޭއިން ވިދާޅުވީ، މިވަގުތު ރާއްޖެއަށް މި ވައިރަސްގެ ނުރައްކާ އޮތް މިންވަރު ކުޑަ ކަމަށެވެ. ނަމަވެސް އިންޑިއާގެ ހާލަތު ވަރަށް ގާތުން މޮނިޓަރު ކުރަމުންދާ ކަމަށާއި، ބައްޔާ ގުޅޭ އެއްވެސް ކޭސްއެއް ނުވަތަ ކޮންޓެކްޓެއް މިހާތަނަށް ރާއްޖެއިން ރިޕޯޓްކޮށްފައިނުވާ ކަމަށްވެސް އެ އެޖެންސީން ބުންޏެވެ.
ނިޕާ ވައިރަސް ޖެހުމުން ފެންނަ އާންމު އަލާމާތްތަކުގެ ތެރޭގައި:
ހުން އައުން
ބޮލުގައި ރިއްސުން
ކެއްސުމާއި ކަރުގައި ރިއްސުން
ނޭވާލާން އުނދަގޫވުން ހިމެނެއެވެ.
އެޗްޕީއޭއިން އިތުރަށް ހާމަކުރި ގޮތުގައި، ބަލި ބޮޑުވަމުންދާ ވަރަކަށް ސިކުނޑިއަށް އަސަރުކޮށް، ވާނުވާ ނޭނގުމާއި ފިޓުޖެހުން ފަދަ ނުރައްކާތެރި އަލާމާތްތައް ފެނުމަކީ އެކަށީގެންވާ ކަމެކެވެ. ބައެއް ހާލަތްތަކުގައި އެއްވެސް އަލާމާތެއް ނުފެނިވެސް ބަލި ހުރެދާނެއެވެ.
މި ބައްޔަށް ވަކި ހާއްސަ ފަރުވާއެއް ނެތް ނަމަވެސް، ބަލީގެ އަލާމާތްތަކަށް ފަރުވާ ކުރެވޭނެ ކަމަށް އެޗްޕީއޭއިން ބުނެއެވެ. އެހެންކަމުން ބަލި ފެތުރޭ ސަރަހައްދުތަކަށް ދަތުރުކުރާ ފަރާތްތަކުން ރައްކާތެރިކަމުގެ ފިޔަވަޅުތައް އެޅުމަށް އެ އެޖެންސީން ވަނީ އިލްތިމާސްކޮށްފައެވެ.
