ދަޢުލަތުގެ ބެލުމުގެ ދަށުގައި ތިބޭ ކުދިން ފޯސްޓަރ ކުރުމުގެ ފުރުޞަތު، މިނިސްޓްރީ އޮފް ސޯޝަލް އެންޑް ފެމެލީ ޕްރޮޓެކްޝަނުން ހުޅުވާލައިފި އެވެ.
މިނިސްޓްރީ އޮފް ސޯޝަލް އެންޑް ފެމެލީ ޕްރޮޓެކްޝަނުން މި ފުރުޞަތު ހުޅުވާލާފައިވާކަން ހާމަކުރީ އެކްސްގައި ހިއްސާކުރި ޕޯސްޓެއްގައެވެ. އެ މިނިސްޓްރީން ބުނީ މި ފުރުޞަތު ހުޅުވާލާފައި މިވަނީ ދަޢުލަތުގެ ބެލުމުގެ ދަށުގައި ތިބޭ ކުދިންގެ ތެރެއިން، އެކި ސަބަބުތަކާހުރެ ޢާއިލާތަކާ އަނބުރާ ހަވާލުނުކުރެވޭ ކުދިންނަށް ބޭނުންވާ ލޯތްބާއި އަޅާލުން ލިބޭނެ ރައްކާތެރި ޢާއިލީ މާޙައުލެއް ހޯދައިދިނުމުގެ ގޮތުން ކަމަށެވެ. އެގޮތުން އެފަދަ ކުދިންގެ ޤާނޫނީ ބެލެނިވެރިކަން އެހެން ފަރާތަކާ ހަވާލުކުރެވިގެންދާނެ އެވެ.
ޢާންމު ގޮތެއްގައި ކުދިން ފޯސްޓަރ ކުރެވޭނީ ދެ ގޮތަކަށެވެ. އެއީ:
- ވަގުތީ ގޮތުން ކުއްޖަކު ބެލެހެއްޓުން: ކުއްޖާގެ ޢާއިލާއަށް ދިމާވެފައިވާ ޙާލަތު ރަނގަޅުވަންދެން ނުވަތަ ވަކި މުއްދަތަކަށް ކުއްޖާ ބަލަހައްޓާނެ ފަރާތަކާ ކުއްޖާ ހަވާލުކުރުން.
- ދާއިމީކޮށް ކުއްޖާ ބެލެހެއްޓުން: ކުއްޖާގެ ޤާނޫނީ ބެލެނިވެރިކަން ފޯސްޓަރ ކުރާ ފަރާތަށް ބަދަލުކުރުމާއެކު، ކުއްޖާއަށް 18 އަހަރު ފުރެންދެން ދާއިމީކޮށް ބެލެހެއްޓުމަށް ކުއްޖާ ހަވާލުކުރުން.
ކުދިން ފޯސްޓަރ ކުރުމަށް ޝައުގުވެރިވާ ފަރާތްތަކުން ޗައިލްޑް އެންޑް ފެމެލީ ޕްރޮޓެކްޝަން ސަރވިސަސްއަށް ”ދައުލަތުގެ ބެލުމުގެ ދަށުގައި ތިބޭ ކުދިން ބަލަހައްޓައިދިނުމަށް އެދި ހުށަހަޅާ ފޯމް“ ހުށަހަޅަންޖެހޭނެއެވެ. މިނިސްޓްރީން ހިއްސާކޮށްފައިވާ ކިއުއާރް ކޯޑް ސްކޭން ކޮށްގެން، ނުވަތަ ހިއްސާކޮށްފައިވާ ލިންކް މެދުވެރިކޮށް މި ފޯމް ލިބޭނެއެވެ.
މިކަމާ ގުޅޭގޮތުން އިތުރު މަޢުލޫމާތު ސާފުކުރައްވަން ބޭނުންފުޅުވާ ފަރާތްތަކުން އެ ސަރވިސްގެ ކޯލް ސެންޓަރ ނަންބަރު 1433 ނުވަތަ 3027576 އަށް ގުޅުއްވާ މަޢުލޫމާތު ސާފުކުރެއްވުމަށް ވަނީ އެދިފައެވެ. އަދި info.cfps@msfd.gov.mv އަށް އީމެއިލް ކޮށްގެން ވެސް މަޢުލޫމާތު ސާފުކުރެވޭނެއެވެ.
”ކޮންމެ ކުއްޖަކަށް ޢާއިލާއެއް“ ގެ ނަމުގައި ސަރުކާރުން ޚާއްސަ އިސްކަމެއް ދެއްވައިގެން ކުރިއަށްގެންދާ މި މަސައްކަތަކީ، ކޮންމެ ކުއްޖަކަށް ވެސް ޢާއިލީ ލޯތްބާއި އަޅާލުން ލިބޭނެ މަގު ފަހިކޮށްދިނުމުގެ ގޮތުން ކުރިއަށްގެންދާ މަސައްކަތެކެވެ.
