މި އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލުމުގެ މުއްދަތު ހަމަވިއިރު، ފޯމު ހުށަހަޅާފައިވާ ގޮތުގެ ފަހުގެ ތަފްސީލުތައް އިލެކްޝަންސް ކޮމިޝަނުން ހާމަކޮށްފިއެވެ.
25 ޖަނަވަރީ 2026 ވީ ދުވަހުގެ ހެނދުނު 10:00 އާ ހަމައަށް ލިބިފައިވާ ތަފްސީލުތަކަށް ބަލާއިރު، ލޯކަލް ކައުންސިލްތަކުގެ ގޮނޑިތަކަށް ކުރިމަތިލީ މީހުންގެ ތެރެއިން ޖުމްލަ 750 ކެންޑިޑޭޓެއްގެ ފޯމު ވަނީ ޤަބޫލުކޮށްފައެވެ. އޭގެ ތެރޭގައި ސިޔާސީ ޕާޓީތަކުން ކުރިމަތިލީ 617 ކެންޑިޑޭޓުންނާއި، އަމިއްލަ ގޮތުން ކުރިމަތިލީ 133 ކެންޑިޑޭޓުން ހިމެނެއެވެ. ނަމަވެސް، އެކި ސަބަބުތަކާ ހުރެ 183 ކެންޑިޑޭޓެއްގެ ފޯމު ވަނީ ބާތިލުކޮށްފައެވެ. އޭގެ ތެރޭގައި ސިޔާސީ ޕާޓީތަކުން ހުށަހެޅި 113 ފޯމާއި އަމިއްލަ ގޮތުން ހުށަހެޅި 70 ފޯމު ހިމެނެއެވެ. ކެންޑިޑަސީ ޤަބޫލުނުކުރުމާ ގުޅިގެން އަލުން ފޯމު ހުށަހަޅާފައިވަނީ ޖުމްލަ 77 މީހުންނެވެ. (ޕާޓީތަކުން 41 އަދި އަމިއްލަ ގޮތުން 36 މީހުން).
އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ބަލާއިރު، ޖުމްލަ 574 ކެންޑިޑޭޓެއްގެ ފޯމު ވަނީ ޤަބޫލުކޮށްފައެވެ. މީގެ ތެރޭގައި ސިޔާސީ ޕާޓީތަކުން ކުރިމަތިލީ 488 ކެންޑިޑޭޓުންނާއި އަމިއްލަ ގޮތުން ކުރިމަތިލީ 86 ކެންޑިޑޭޓުން ހިމެނެއެވެ. މި އިންތިޚާބުގައި 126 މީހެއްގެ ކެންޑިޑަސީ ވަނީ ޤަބޫލުނުކުރަން ނިންމާފައެވެ. އެއީ ސިޔާސީ ޕާޓީތަކުން ހުށަހެޅި 77 ފޯމާއި އަމިއްލަ ގޮތުން ހުށަހެޅި 49 ފޯމެވެ. ކެންޑިޑަސީ ޤަބޫލުނުކުރުމުން އަލުން ފޯމު ހުށަހަޅާފައިވަނީ 34 މީހުންނެވެ. (ޕާޓީތަކުން 15 އަދި އަމިއްލަ ގޮތުން 19 މީހުން) ނެވެ.
ކެންޑިޑޭޓުންގެ ފޯމުތައް ޤަބޫލުނުކުރި މައިގަނޑު ސަބަބުތަކުގެ ތެރޭގައި ކުށާއި ދަރަނީގެ ރެކޯޑުތައް ފުރިހަމައަށް ހުށަހަޅާފައިނުވުން ހިމެނެއެވެ. ޚާއްޞަކޮށް، ކުށެއް ނުވަތަ ދަރަންޏެއް އޮތްނަމަ އެކަމުގެ ތަފްސީލު ހުށަހަޅާފައިނުވުމާއި، މޯލްޑިވްސް ކަރެކްޝަނަލް ސަރވިސްއިން ފުރިހަމަކޮށް ހުށަހަޅަންޖެހޭ ކުށުގެ ރެކޯޑު ފޯމުތަކުގައި މައްސަލަ ހުރުން ފާހަގަކުރެވެއެވެ.
މި އިންތިޚާބަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި ބޭއްވޭ ފުރަތަމަ ލޯކަލް ކައުންސިލް އިންތިޚާބަށް ވާއިރު، އިންތިޚާބުގެ ކަންކަން އިންސާފުވެރިކަމާއެކު ކުރިއަށް ގެންދިއުމަށް އިލެކްޝަންސް ކޮމިޝަނުން ދަނީ ތައްޔާރުވަމުންނެވެ.
