ދެ ދަރިވަރަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއްގައި މ. އަތޮޅު މަދަރުސާގެ ކުރީގެ ހެލްތު އެންޑް ފިޒިކަލް އެޑިއުކޭޝަން ޓީޗަރު ޝުޢައިބު ޢަބްދުﷲ ގެ މައްޗަށް ޕްރޮސިކިއުޓަރ ޖެނެރަލްގެ އޮފީހުން ފަސް ދަޢުވާއެއް އުފުލައިފިއެވެ.
ޖިންސީ ގޯނާގެ މި މައްސަލައާ ގުޅިގެން ޕީޖީ އޮފީހުން ބުނީ، ޝުޢައިބުގެ މައްޗަށް ދަޢުވާ ކުރަނީ މ. އަތޮޅު މަދަރުސާގައި އޭނާ ކިޔަވައިދިން ދެ ދަރިވަރެއްގެ ގައިގާ ޖިންސީ ނިޔަތެއް އޮވެގެން އަތްލާފައިވާތީއާއި އެކުދިންނަށް ބަރަހަނާ ވީޑިއޯ ދައްކާފައިވާތީ ކަމަށެވެ.
ޝުޢައިބުގެ މައްޗަށް އުފުލާފައިވާ ދަޢުވާތައް:
– އިތުބާރުކުރެވޭ މަގާމެއްގައި ހުރެ ކުޑަކުއްޖަކާމެދު ޖިންސީ އަމަލެއް ހިންގުމުގެ ދެ ދަޢުވާ
– އިތުބާރުކުރެވޭ މަގާމެއްގައި ހުރެ ކުޑަކުއްޖަކު ލައްވައި ޖިންސީ އަމަލެއް ބެލުވުމުގެ ދެ ދަޢުވާ
– ދިވެހިރާއްޖޭގައި އޮރިޔާން ކާޑު ގެންގުޅުމުގެ އެއް ދަޢުވާ
ފީޖީން ބުނީ މި ދަޢުވާތައް ސާބިތުވެއްޖެނަމަ، ޝުޢައިބުގެ މައްޗަށް މަދުވެގެން 60 އަހަރާއި އެއް މަހާއި ހަ ދުވަހުގެ ޖަލު ޙުކުމެއް އަންނާނެ ކަމަށެވެ.
