ރާއްޖޭގެ ޤައުމީ ފުޓްސަލް ޓީމުން ސާފް ފުޓްސަލް ޗެމްޕިއަންޝިޕް ކާމިޔާބުކޮށްފައިވާތީ ފުޓްސަލް ޓީމަށާއި ސްރީލަންކާގައި ނިމިދިޔަ 2025 ވަނަ އަހަރު ބޭއްވި ސުޕަ ކަޕްގެ ޗެންޕިއަންކަން ހޯދި ފުޓްބޯޅަ ޓީމަށް އެއް މިލިޔަން ރުފިޔާގެ ބޯނަހެއް ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
މިކަން ހާމަކުރައްވާ ޕީއެސްއެމް ނިއުސްއަށް ދެއްވި އިންޓަވިއުއެއްގައި ސްޕޯޓްސް މިނިސްޓަރު އަބްދުﷲ ރާފިޢު ވިދާޅުވީ، ރައީސް ޑރ. މުޢިއްޒު ނިންމަވާފައިވަނީ ހުރިހާ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް މި ބޯނަސް ދެއްވުމަށް ކަމަށެވެ.
މިއީ ރައީސް ޑރ. މުޢިއްޒު މިދިޔަ އަހަރުގެ އޮކްޓޫބަރު މަހުގެ 2 ވަނަ ދުވަހު ޤައުމީ ޓީމާއެކު ސިޓްރޮން ރެސްޓޯރެންޓުގައި ބޭއްވެވި ބައްދަލުކުރެއްވުމެއްގައި ނިންމަވާފައިވާ ނިންމެވުމެއް ކަމަށް މިނިސްޓަރު ރާފިޢު ވިދާޅުވިއެވެ. މިނިސްޓަރު ވިދާޅުވީ ކުޅުންތެރިންނާ މި ފައިސާ ހަވާލުކުރަނީ ފުޓްބޯޅަ އެސޯސިއޭޝަން އޮފް ދަ މޯލްޑިވްސް މެދުވެރިކޮށް ކަމަށެވެ.
ސްރީލަންކާގައި މިދިޔަ އަހަރުގެ ސެޕްޓެމްބަރު މަހު ބޭއްވި ސުޕަކަޕް ކާމިޔާބުކޮށް ޤައުމީ ފުޓުބޯޅަ ޓީމު ރާއްޖެއަށް ތަށި ގެނެސްދީފައިވާއިރު، މިއީ ރާއްޖެއަށް ތައްޓެއް ނުލިބި ގިނަ އަހަރުތަކެއް ފަހުން ގައުމީ ޓީމުން ހޯދި ފުރަތަމަ ތަށިކަން ފާހަގަކޮށްލެވެއެވެ.
ގައުމީ ޓީމުގެ ކުޅުންތެރިން ހޯދާ މިފަދަ ކާމިޔާބީތަކުގެ އަގުވަޒަންކުރުމުގެ ގޮތުން ސަރުކާރުން ވަނީ ކުޅުންތެރިންނަށް ފައިސާގެ އިނާމުދޭން ވެސް ނިންމަވައިފަ އެވެ. ފުޓްބޯޅަ އާއި ފުޓްސަލްގެ އިތުރުން އެހެނިހެން ކުޅިވަރުތަކުން ރާއްޖެއަށް ރީތިނަން ހޯދައިދޭ ކުޅުންތެރިންނަށް ވެސް ސަރުކާރުން ހިތްވަރު ދިނުމުގެ ގޮތުން ފައިސާގެ އިނާމު ދެއްވައެވެ.
