ޕީއެންސީގެ ފަރާތުން މާލެސިޓީގެ މޭޔަރު ކަމަށް ވާދަކުރައްވާ މޫސާ ޢަލީ ޖަލީލަކީ އެ މަނިކުފާނުގެ ޗޮއިސްއެއް ކަމަށާއި އެ މަޤާމަށް ޖަލީލު ކުރިމަތިލެއްވީ އެކަމަށް އެމަނިކުފާނު އެދިވަޑައިގަތުމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ޕީއެންސީން އިއްޔެ ޕީއެންސީން ބޭއްވި ކެމްޕެއިންގެ ހަރަކާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ މޭޔަރު ކަމަށް ނުކުންނެވުމަށް މޫސާ ޢަލީ ޖަލީލުގެ އަރިހުގައި އެދިވަޑައިގަތީ އޭނާއަކީ ސަރުކާރުން މާލޭގެ ރައްޔިތުންނަށް ވެފައިވާ ވަޢުދުތައް ފުއްދުމަށް އެއްބާރުލުން ދެއްވައިގެން ވަރަށް އަމާނާތްތެރިކަމާއި އިޚުލާސްތެރިކަމާއި ހީވާގި ކަމާއެކު މަސައްކަތް ކުރައްވާނެ ބޭފުޅަކަށް ވާތީ ކަމަށެވެ. އަދި މޫސާ ޢަލީ ޖަލީލަކީ ފަސްބައިގަ އެއްވެސް ކަހަލަ ހަޑިކަމެއް ނެތް، ހީވާގި ޤައުމީ ޖޯޝު ހުރި ޤައުމީވަންތަ ޤައުމު ފަޚުރުވެރިވާ ފަދަ ބޭފުޅަކަށް ވާތީ މާލޭގެ މޭޔަރު ކަމަށް ކުރިމަތިލެއްވުމަށް އެދިވަޑައިގެންނެވި ކަމަށެވެ.
ރައީސް ވަނީ ޕީއެންސީއިން އެރުވި ފުރުޞަތު ޤަބޫލު ކުރެއްވީތީ މޫސާ ޖަލީލަށް ޝުކުރު އަދާކުރައްވާފައެވެ.
ޕީއެންސީ ހަރުގޭގައި ބޭއްވި މި ޙަފުލާގައި ގިނަ ބަޔަކު ބައިވެރިވެފައިވާއިރު، އެމަނިކުފާނު ވިދާޅުވީ ޤައުމުގައި މިހާރު އޮތީ ހަމަޖެހުން ގާއިމް ވެފައިވާ ކަމަށާއި ލޯކަލް ލެވެލެއްގައި ރަށެއްގައި ”ސަކަރާތް ޖަހަން“ ކައުންސިލަރުން އިންތިޚާބު ކޮށްގެން ނުވާނެ ކަމަށެވެ.
ސަރުކާރުން ހިންގާ ރާވާ ކަންކަމަށް ހުރަސްތައް މެދުވެރިކޮށް، ރައްޔިތުންގެ މެދުގައި ހަމަނުޖެހުން އުފައްދާ ބަޔަކު އިންތިޚާބު ކޮށްގެން ނުވާނެ ކަމަށް ވެސް ރައީސް ވިދާޅުވިއެވެ.
