ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ އެންމެ މަތީ ފަންތީގެ އެއް ރިސޯޓު ކަމަށްވާ ވަލްޑޯފް އެސްޓޯރިއާ އިތާފުށިން މިއަހަރުގެ ޖެނުއަރީ މަހުގެ ސާވިސް ޗާޖުގެ ގޮތުގައި ކޮންމެ މުވައްޒަފަކަށް 4،117.28 ޑޮލަރު (63،484ރ.) ދީފިއެވެ.
މިއީ ރާއްޖޭގެ ރިސޯޓުތަކުން މިދިޔަ މަހު ދިން ސާވިސް ޗާޖަށް ބަލާއިރު އެންމެ ބޮޑު އަދަދެވެ. މި އަދަދާއެކު، އެ ރިސޯޓަކީ މުވައްޒަފުންނަށް އެންމެ ރަނގަޅު އާމްދަނީއެއް ހޯދައިދޭ އެއް ރިސޯޓުގެ ގޮތުގައި ވަނީ ފާހަގަވެފައެވެ.
މާލެއާ 25 ކިލޯމީޓަރު ދުރުގައި އޮތް ފަޅެއްގައި ތަރައްގީކޮށް 2019 ވަނަ އަހަރު ހުޅުވި ރިސޯޓުން މިދިޔަ މަހު ވެސް ސާވިސް ޗާޖުގެ ގޮތުގައި ކޮންމެ މުވައްޒަފަކަށް 2،097 ޑޮލަރު ދިނެވެ.
އެ ރިސޯޓުގެ ވިލާ އެއް ވިއްކަނީ ރެއަކަށް 5000 ޑޮލަރަށް ވުރެ މަތިންނެވެ. މީގެ އިތުރުން ރެއަކަށް 100،000 ޑޮލަރަށް ވުރެ ބޮޑު އަގުގައި ވިއްކާ ހަތް ވިލާ އެކުލެވޭ 32،000 އަކަމީޓަރުގެ ބޮޑު ޕްރައިވެޓް އައިލެންޑެއް ވެސް އެ ރިސޯޓާއެކު ހިންގައެވެ.
މި ރިސޯޓުގައި ގިނައިން ޗުއްޓީ ހޭދަކުރަނީ ބޮޑެތި މަހުޖަނުންނާއި ސެލެބްރިޓީންނެވެ. އެންމެ ފަހުން އެ ރިސޯޓަށް އައި ކަމަށް ވަނީ އިންޑިއާގެ މަޝްހޫރު ބިލިއަނަރު މުކޭޝް އަމްބާނީގެ ދަރިފުޅު އަނަންތު އަމްބާނީ އާއި އޭނާގެ އަންހެނުންނެވެ.
