މިދިޔަ ސަރުކާރުގައި ރާއްޖޭގެ ކަނޑުގެ ސަރަޙައްދުން ބޮޑު ބައެއް ވިއްކާލުމުން ވެސް ހަނުހުންނެވި ނަޝީދު، ފޯޅަވަހީގެ ސިޔާދަތީ ބެލެނިވެރިކަން ރާއްޖެއަށް ލިބުމުގެ ފުރުސަތު އަދިވެސް ގެއްލިގެން ނުދާކަމަށް ވިދާޅުވެއްޖެ އެވެ.
މިކަމާ ގުޅިގެން އެކްސްގައި ހިއްސާކުރެއްވި ޕޯސްޓެއްގައި ނަޝީދު ވިދާޅުވީ، ޗާގޯސް ޖަޒީރާތައް މޮރިޝަސްއަށް ދިނުމުގެ ބިލު، އިނގިރޭސި މަތިގޭގެ ވޯޓަށް ތައްޔާރުވެފައި ވަނިކޮށް، ބިލަށް ވޯޓު ދިނުން ފަސްކޮށްފައިވުމުގެ ސަބަބުން ފޯޅަވަހީގެ ސިޔާދަތީ ބެލެނިވެރިކަން ރާއްޖެއަށް ލިބުމުގެ ފުރުސަތު އަދިވެސް ގެއްލިގެން ނުދާ ކަމަށެވެ.
ނަޝީދު ވިދާޅުވީ އިނގިރޭސި ސަރުކާރުން މޮރިޝަސްއަށް ޗާގޯސް ހަވާލުކުރުން މަޑުޖައްސާލުމަކީ، ރާއްޖެއިން ޗާގޯސް ހޯދުމަށް ކުރާ މަސައްކަތަށް އިތުރު ކުރިއެރުންތަކެއް ލިބިގެންދާނެ ކަމެއް ކަމަށެވެ. މޮރިޝަސްއަށްވުރެ ބޮޑަށް ފޯޅަވަހީގެ ބެލެނިވެރިކަމަށް ރާއްޖެއަށް ދައުވާ ކުރެވޭނެ ކަން ފާހަގަކުރައްވަމުން ނަޝީދު ވިދާޅުވީ ފޯޅަވައްސާއި ރާއްޖެއާ ދެމެދު ތާރީހީ ބޮޑު ގުޅުމެއް އަަބަދު ވެސް އޮންނަ ކަމަށެވެ.
ނަޝީދު މި މޭރުމުން ވިދާޅުވެފައިވާއިރު، އިނގިރޭސިވިލާތުގެ ”އެކްސްޕްރެސް“ ނޫހަށް ދެއްވި ބަސްދީގަތުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ، ޗާގޯސްގެ ސިޔާދަތީ ބާރު ރާއްޖެއަށް އޮތުމުގެ ހައްގު މާ ބޮޑު ކަމަށް ވިދާޅުވެފަ އެވެ. އަދި ހަމައެހެންމެ، މިދިޔަ ސަރުކާރުގައި ރާއްޖޭގެ ކަނޑުގެ ސަރަހައްދުން ބޮޑު ބައެއް ދޫކޮށްލީ ގާނޫނާ ހިލާފަށް ކަމަށާއި އެކަމުގައި ރައްޔިތުންގެ ބަހެއް ވެސް ހޯދާފައިނުވާކަން ވެސް ރައީސް ފާހަގަކުރެއްވި އެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ގެންދަވަނީ މިދިޔަ ސަރުކާރުން ވިއްކާލި ކަނޑުގެ ސަރަހައްދު އަކުން ހޯދުމުގެ މަސައްކަތް ކުރަމުންނެވެ.
