މާލޭ ސިޓީ ކައުންސިލުގެ ހުރިހާ މަސައްކަތްތަކެއް ކުރަމުން އަންނަނީ ވެރިކަން ކުރާ ޕާޓީ، ޕީއެންސީއަށް ނިސްބަތްވާ ކައުންސިލަރުން ނަމަވެސް، އެ މަސައްކަތްތަކުގެ ކްރެޑިޓް ނަންގަވަމުން ގެންދަވަނީ އެމްޑީޕީގެ މިހާރުގެ މޭޔަރު އާދަމް އާޒިމް ކަމަށް މާލޭ ސިޓީގެ ޑެޕިއުޓީ މޭޔަރު މުޙައްމަދު ޢަރީޝް ވިދާޅުވެއްޖެއެވެ.
ޢަރީޝް މި ބީދައިން ވިދާޅުވީ ”އެމްއެމްޓީވީ“ގެ ބޮޑު ޚަބަރު ޕްރޮގްރާމްގައި ވާހަކަދައްކަވަމުންނެވެ.
ގަލޮޅު ސިޓީ ޕާކު ތަރައްޤީކުރުމުގެ މަސައްކަތަކީ މާލޭ ސިޓީ ކައުންސިލުގެ ހަތަރު ވަނަ ދައުރަށް ހޮވުނު ޕީއެންސީގެ މެންބަރުންނާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފެއްޓެވި މަސައްކަތެއްކަން ޢަރީޝް ފާހަގަކުރެއްވިއެވެ. ޢަރީޝް ވިދާޅުވީ، ގަލޮޅު ސިޓީ ޕާކު ހުޅުވުމަށް މޭޔަރާއެކު ހުރިހާ ކައުންސިލަރުން ބައިވެރިވާން މޭޔަރު އާޒިމްގެ އަރިހުން ތަކުރާރުކޮށް އެދިފައިވާނެ ކަމަށާއި، ނަމަވެސް ޕާކު ހުޅުވުމުގެ ރަސްމިއްޔާތަށް ޕީއެންސީއަށް ނިސްބަތްވާ އެއްވެސް ކައުންސިލަރަކަށް ދައުވަތު ނުދެއްވާ ކަމަށެވެ.
”ތިބޭފުޅުންނަށް ފެނިގެންދާނެ މިފަހުން އޭރުގެ ޑެޕިއުޓީ މޭޔަރުކަމުގެ މަގާމުގައި ހުންނެވި ނަރީޝް އޭރުގެ މަސައްކަތްތައް ހިއްސާކުރައްވައި ވީޑިއޯތައް އާއްމުކުރަމުންދާ މަންޒަރު. މިއީ އިދިކޮޅު މެމްބަރުންނާއި އަޅުގަނޑުމެން އެކުވެގެން ގުޅިގެން ކުރިއަށް ގެންދިޔަ ބުރަ މަސައްކަތެއް. ގިނިކަންޏާ ޕީއެންސީގެ މެމްބަރަކަށް އަންގާވެސް ނުލާ ކުޑަ ކުދިންކޮޅެއް ގޮވައިގެން ގޮސް ހުޅުވާލާފައި ދިޔައީ. މިއީ ދެރަވަރު ކަންކަން. ކައުންސިލަރުންނަށް އޭގެ ކްރެޑިޓް ލިބެންޖެހޭނެ“ – މާލޭ ސިޓީގެ ޑެޕިއުޓީ މޭޔަރު މުޙައްމަދު އަރީޝް ވިދާޅުވިއެވެ.
ގަލޮޅު ސިޓީ ޕާކުގެ މަސައްކަތްތައް ކުރީ ކައުންސިލަރުން ކަމަށްވީއިރު އެ ބޭފުޅުންނަށް ކްރެޑިޓެއް ނުލިބި މޭޔަރު އާޒިމް ކްރެޑިޓް ނެންގެވުމަކީ ހިތާމަކުރައްވާ ކަމެއް ކަމަށް ޢަރީސް އިތުރަށް ވިދާޅުވިއެވެ.
މޭޔަރު އާޒިމަށް މިފަދަ ތުހުމަތެއް ޢަރީޝް ކުރެއްވިއިރު، ގިނަ ދުވަސްވެ ވީރާނާވެފައި އޮތް ގަލޮޅު ސިޓީ ޕާކުގައި މުހިއްމު ވަސީލަތްތަކާއެކު އައު ޕާކެއް ހެދުމަށް ނިންމައި މިކަމުގައި ރައްޔިތުންގެ ޚިޔާލު ހޯދުމަށް މޭޔަރުކަމުގައި އޭރު ހުންނެވި، އަދި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމަށް ގަލޮޅުގައި ދިރިއުޅޭ ރައްޔިތުންނާއެކު ބައްދަލުވުންތަކެއް ވެސް ބޭއްވެވިއެވެ. މި ބައްދަލުވުންތަކުން ރައްޔިތުންގެ މަޝްވަރާ ހޯދައި ޕާކުގެ ކުރެހުން އެކުލަވާލީ ގަލޮޅު ރައްޔިތުންގެ ފުރިހަމަ ތާއީދާއެކުގައިކަން ފާހަގަކޮށްލަންޖެހެއެވެ.
