ހުޅުމާލޭގެ ތިންވަނަ ފިޔަވަހި ހިއްކުމުގެ ބޮޑު މަޝްރޫއު،
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން ކާމިޔާބުކަމާއެކު ނިންމާލައިފިއެވެ.
އިދިކޮޅު ފަރާތްތަކުން މި މަޝްރޫޢު ކުރިއަށް ނުގެންދެވޭނެ ކަމަށް ބުނެ ފާޑުކިޔަމުން ދަނިކޮށް، ސަރުކާރުން ވަނީ ރެކޯޑު ދުވެއްޔެއްގައި މި މަސައްކަތް ނިންމާލާފައެވެ.
މި މަޝްރޫއުގެ ދަށުން ޖުމްލަ 63 ހެކްޓަރުގެ ބިން ވަނީ ހިއްކާފައެވެ. ހުޅުމާލެ ފޭސް 3 ހިއްކުމުގެ މަސައްކަތް ބާރުމިނެއްގައި ކުރިއަށް ގެންދިއުމަށްޓަކައި ދުނިޔޭގެ އެންމެ ބޮޑު އެއް ޑްރެޖަރު ވަނީ ރާއްޖެ ގެނެސްފައެވެ. އެގޮތުން، އެއްފަހަރާ 22,000 ކިއުބިކް މީޓަރުގެ ވެލި ނެގުމުގެ ގާބިލުކަން ހުރި ”ޕްރިންސް ދަ ނެދަލޭންޑެން“ އަދި ”އޮރެންޖް“ ޑްރެޖަރު ބޭނުންކޮށްގެން ވަނީ މި ބިޔަ މަޝްރޫއު ނިންމާލާފައެވެ.
މިއީ މޮލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާ ހަވާލުކޮށްގެން ކުރިއަށް ގެންދިޔަ މަސައްކަތެކެވެ. މާލެ ސަރަޙައްދުގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް (ޓޯޓަލް ސޮލިއުޝަން) ހޯދައިދިނުމަކީ ރައީސް ޑރ. މުޢިއްޒުގެ އެންމެ މުހިންމު އެއް ވަޢުދުފުޅެވެ. އެމަނިކުފާނުގެ މި ވަޢުދުފުޅާއި އެއްގޮތަށް، ސަރުކާރުން ދަނީ ބޯހިޔާވަހިކަމުގެ ގިނަ މަޝްރޫޢުތަކެއް ހިންގަމުންނެވެ.
ހުޅުމާލޭގެ ތިންވަނަ ފިޔަވަހީގެ އިތުރުން، ގިރާވަރުފަޅު، ގުޅީފަޅު އަދި އުތުރުތިލަފަޅު ހިއްކުމުގެ މަސައްކަތަކީ ވެސް ރައްޔިތުންނަށް އޭގެ ސަބަބުން ބޮޑެތި ފައިދާތަކެއް ކުރާނެ މަޝްރޫޢުތަކެއްގެ ގޮތުގައި ސަރުކާރުން ފާހަގަކުރެއެވެ. މި މަޝްރޫޢުތައް ނިމުމުން މާލެ ސަރަހައްދުގެ ބޯހިޔާވަހިކަމުގެ ތަކުލީފުތަކަށް ބޮޑު ލުޔެއް ލިބިގެންދާނެއެވެ.
އިދިކޮޅު ފަރާތްތަކުގެ ފާޑުކިޔުންތަކަށް ބެލުމެއްނެތް، މި މަޝްރޫޢު ނިންމާލުމަކީ ރައީސް މުޢިއްޒުގެ ސަރުކާރުން ތަރައްޤީގެ މަސައްކަތްތަކުގައި ގެންގުޅޭ ހަލުވި ދުވެލި ހާމަކޮށްދޭ ކަމެއްގެ ގޮތުގައި ގިނަ ބަޔަކު ދެކެއެވެ.
